Ўзбекистонлик таэквондочи Дмитрий Шокин Рио—2016 йўлланмасини қўлга киритди

Ўзбекистон терма жамоаси аъзоси Жасур Бойқўзиев Мексикада ўтказилган таэквондо WTF бўйича Гран-при турнирида бронза медалини қўлга киритди, аммо Рио-де-Жанейродаги Олимпиада йўлланмаси Ўзбекистоннинг бошқа бир вакили Дмитрий Шокинга насиб этди. Бу ҳақда «12news.uz» хабар бермоқда.

Дмитрий Шокин ва Жасур Бойқўзиев рейтингда дастлабки икки ўринни банд этди, аммо қоидаларга кўра, Олимпиадада бир мамлакатнинг икки вакили бир вазн тоифасида иштирок этолмайди.

Эслатиб ўтамиз, жорий йил Челябинскда ўтказилган ЖЧда 23 ёшли Дмитрий Шокин олтин медални қўлга киритиб, Ўзбекистон тарихида илк бор таэквондо WTF бўйича жаҳон чемпионига айланди. Мавсум давомида 10 та турнирда ғалаба қозониб, нафақат олимпия, балки жаҳон рейтингида ҳам биринчи ўринга чиқиб олди.

Мексикадаги турнир якунларига кўра, 26 давлатдан келган спортчилар Олимпиаданинг 48 та йўлланмасини қўлга киритди. Қолган йўлланмалар 2016 йили қитъалараро саралаш турнирларида ўйналади.