Истеъфога тайёр Эрдўғон, Ўзбекистонда сезилган зилзила, Сурияда иккинчи рус базаси ва куннинг бошқа муҳим янгиликлари

«Дарё»да доимий рукн — ҳар куни энг муҳим янгиликларнинг кечки дайжести бериб борилади.

1. Эрдўғон Путиннинг Туркия ИШИДдан нефть харид қилаётгани ҳақидаги сўзлари тасдиқлангудек бўлса, истеъфога чиқишга тайёрлигини билдирди. Яна, Россия билан муносабатларда юзага келган инқирозни дипломатик йўл билан ҳал қилиш жоиз, дейди Туркия президенти.

2. Тошкентда ерости силкинишлари сезилди. Одамлар кучсиз зилзилаларга ўрганиб ҳам қолди — бутун ноябрь давомида Афғонистон ва Қирғизистондаги ҳар бир кучли ерости силкинишлари Андижондан Тошкентга қадар сезилиб турди.

3. Times: Россия Сурияда иккинчи авиабазасини очмоқчи. Россия Мудофаа вазирлиги бу хабарни ҳозирча изоҳлагани йўқ, бироқ воқеалар бу гапларни ҳақиқатга айлантириш томон ривожланмоқда.

4. «Лукойл» Ўзбекистонда қазилмаларни қидириб топиш ва қазиб олишга 759 миллион доллар йўналтирди. 2015 йилнинг учинчи чорагида Россия компаниясининг Ўзбекистонга инвестициялари ҳажми 263 миллион долларни ташкил этди.

5. Ўзбекистонда 2020 йилгача интернетни ривожлантиришга 883,7 миллион доллар сарфланади. Шундан кейин интернет тезлиги 20 мартага ошади, дейишяпти.