30 ноябрь куни Алоқа тарихи музейида Ўзбекистонда кенг полосали интернетга уланиш ҳолати ва ривожланиш истиқболларига бағишланган матбуот анжумани ташкил этилди, дея хабар бермоқда Ахборот технологиялари ва коммуникацияларини ривожлантириш вазирлиги матбуот хизмати.
Унда таъкидланганидек, кейинги йилларда мамлакатда Интернетга кенг полосали уланиш тармоқлари ва турли ахборот ресурсларини ривожлантириш бўйича лойиҳалар амалга ошириб келинмоқда. Ўзбекистон Республикаси Президенти томонидан 2013 йилда тасдиқланган 2013—2020 йилларда Ўзбекистон Республикасида телекоммуникация технологиялари, тармоқлари ва алоқа инфратузилмасини ривожлантириш дастури кенг полосали уланишни ривожлантиришда муҳим аҳамият касб этади.
Дастур ўзида умумий суммаси 883,7 миллион доллардан иборат 9 та йирик инвестиция лойиҳаларини жамлаган, улар орасида қуйидаги лойиҳалар мавжуд:
- мобил алоқа тармоқларини, хусусан, HSPA+, 4G LTE технологияларини ривожлантириш;
- стационар ва симсиз кенг полосали уланиш тармоқларини кенгайтириш;
- маълумотлар узатиш магистраль ва мультисервис тармоқларини кенгайтириш, оптик толали алоқа линияларини қуриш;
- мультимедиа хизматларининг янги турларини жорий этиш ва контентни ривожлантириш учун қулай шароитларни яратиш.
Бундан ташқари, лойиҳалар 20 дан ортиқ янги хизмат турлари жорий этилиши, жумладан, IP-телевидения, IP-телефония ва бошқа хизматлар янада ривожланишига туртки бериши назарда тутилган.
Изоҳ (0)