2015 йилнинг ноябрь ойида Тошкент шаҳридаги хонадонлар ижарасининг ўртача нархлари жорий йилнинг октябрь ойи билан солиштирилганда 7% га арзонлашди ва 1 квадрат метр учун ижара қиймати 6,3 шартли бирликни ташкил этди. Сўнгги бир неча ойлар давомида кўчмас мулк нархларининг пасайиши билан бир қаторда ижара нахларининг ҳам пасайиши кузатилмоқда.
Квартиларларни ижарага олиш нархларининг сезиларли даражада пасайиши Тошкент шаҳрининг Миробод, Шайхонтоҳур ва Юнусобод туманларида кузатилди.
Тошкент шаҳри бўйича ижарага бериладиган энг қиммат хонадонлар Миробод туманида жойлашган бўлиб, ушбу ҳудудда 1 кв.м учун ижара нархи 2015 йилнинг ноябрь ойида 7.6 ш.б. ни ташкил этди. Ижарага бериладиган энг арзон квартиралар эса Тошкент шаҳрининг Бектемир ва Сирғали туманларида жойлашган бўлиб, мазкур ҳудудлардаги квартиралар ижарасининг ўртача 1 кв.м 2,8 ва 3,3 ш.б. ни ташкил этмоқда.
Шуни таъкидлаш жоизки, туманлар ичидаги нархларда ҳам анча сезиларли тафовутлар мавжуд. Хусусан, ижарага бериш учун таклиф этилаётган хонадонларнинг энг қимматлари Тошкент шаҳрининг Тарас Шевченко ва Нукус кўчаларида ҳамда Ойбек метроси атрофларида жойлашган.
Шунингдек, ижарага берилаётган хонадонлар сони бўйича Миробод ва Мирзо Улуғбек туманлари етакчилик қилмоқда, мазкур туманлар Тошкент шаҳри бўйича жами ижарага берилаётган хонадонлар бўйича таклифнинг 54 фоизини ташкил этмоқда. Ўз навбатида ижарага берилаётган хонадонларнинг кейинги ўринлари Юнособод ва Яккасарой туманларига тўғри келади ва улар жами таклифнинг 18 ва 8 фоизини ташкил қилмоқда.
Талаб нуқтаи назаридан Тошкент шаҳрида икки ва уч хонали квартираларга қизиқиш катта бўлиб, улар жами талабнинг 65 фоизини ташкил этади.
Тошкент шаҳрида ижарага берилаётган хонадонларнинг ўртача нархи 1 хонали квартиралар учун 242 ш.б., 2 хоналилари учун 361 ш.б. ни ва 3 хоналилари учун 565 ш.б. ни ташкил этди.
Баъзи туманлар бўйича квартиралар ижара нархлари (ш.б. да кўрсатилган)
| 1 хона | 2 хона | 3 хона | |
|---|---|---|---|
| Миробод | 286 | 476 | 732 |
| Яккасарой | 260 | 454 | 651 |
| Мирзо Улуғбек | 210 | 322 | 486 |
| Шайхонтоҳур | 173 | 337 | 535 |
| Юнусобод | 231 | 295 | 420 |
| Яшнобод | 159 | 274 | 346 |
| Тошкент шаҳри бўйича ўртача нарх | 225 | 355 | 529 |
Ушбу маълумотлар «UyBor.uz» порталида ижарага берилаётган таклифларнинг ўртача нарх кўрсаткичлари асосида тайёрланган. «Uybor.uz» ва / ёки «Дарё» нашри маъмурияти, ушбу ҳисобот асосида қабул қилинган қарорлар учун жавобгар эмас. Кўчмас мулк ижараси масаласида профессионал маслаҳатга эга бўлиш учун Кўчмас мулк агентикларига мурожаат этинг.
Реклама ҳуқуқи асосида
Изоҳ (0)