АҚШда талончилар томонидан бокс бўйича WBC, WBA ва IBF йўналишлари бўйича биринчи оғир вазнда собиқ жаҳон чемпиони, ямайкалик О’Нил Белл отиб ўлдирилди. Бу ҳақда «Сегодня.ua» хабар бермоқда.
О’Нил Белл профессионал карьерасини 1998 йилда бошланган, 2005 йилда эса Дэйл Браун устидан ғолиб чиқиб, IBF йўналишида жаҳон чемпионлигини қўлга киритганди. Жан Марк Мормек билан баҳсда уни ўнинчи раунда нокаутга учратиб, WBC ва WBA йўналишларида жаҳон чемпионлигини тортиб олади.
Мазкур жанг Белл карьерасининг чўққиси бўлди, шундан сўнг унинг фаолиятида пасайиш бошланди. У Мормекка реванш баҳсини бой берди, кейинчалик Томаш Адамек ва Ричард Холлдан кетма-кет икки мағлубиятга учради. Фаолиятидаги сўнгги жангни О’Нил 2011 йил декабрида ўтказиб, биринчи раунддаёқ Рико Кэйсонни нокаутга учратганди.
Fox News телеканали маълумотларига кўра, 41 ёшли собиқ жаҳон чемпионига Атлантада тўрт нафар номаълум кимса ҳужум қилган. Боксчи ва яна бир йўловчи автобусдан тушаётганда уларга қарата ўқ узилган. О’Нил қаршилик кўрсатишга ҳаракат қилган, бироқ отиб ўлдирилган.
Полиция жиноятчиларни қидиришни бошлади. Тахминларга кўра, ҳужум талончилик мақсадида амалга оширилган.
Изоҳ (0)