Навоий вилоятининг Зарафшон шаҳридаги Тиббий-санитария қисмининг патология-анатомия бўлими мудири отасининг жасадини олиб кетиш учун келган фуқародан 150 минг сўм талаб қилгани учун 5 йилга озодликдан маҳрум этилди. Бу ҳақда «Ҳуқуқ» газетасининг 5 ноябрь сонида ахборот берилган.
Маълум бўлишича, жабрланувчининг отаси Учқудуқ туманидаги дала-ҳовли ҳаммомидан ис газидан ўлган ҳолда топилади. Ўша тунда жасад махсус кўрикдан ўтказиш мақсадида Марказий қон бошқармасига қарашли Тиббий-санитария қисмининг патология-анатомия бўлимига олиб кетилади.
Эртаси куни жабрланувчи отасининг жасадини олиб кетиш учун патология-анатомия бўлимига келади, бироқ бўлим мудири жасад ҳали тўлиқ ўрганилмагани, 14:00 да мурдани олиб кетиш мумкинлигини айтади, кейинроқ муддат 16:00 га кўчирилади.
Кутишдан чарчаган азадорлар 17:00 да мудирнинг олдига киришади, мудир майит билан боғлиқ барча ҳужжатларни расмийлаштириш ва жасадни ўғилга топшириш учун 150 минг сўм пул сўрайди. Пул берилганидан сўнг, жасадни олиб кетишга рухсат беради.
Мудир азадордан олган пулини ўша куни кечки вақтда зиёфат учун ишлатиб юборади. Масъул ходимларининг ноқонуний хатти-ҳаракатларидан қаттиқ ғазабланган азадор ўғил эса орадан икки кун ўтиб, тегишли органларга мурожаат қилади. Мудир олган пулини қайтариб бераётган вақтида қўлга олинади.
«Жиноят ишлари бўйича Зарафшон шаҳар судининг ҳукми билан мудир 5 йил муддатга озодликдан маҳрум этилди», — дейилади «Ҳуқуқ» газетаси хабарида.
Изоҳ (0)