Туркия полицияси Zaman газетасининг инглиз тилидаги нашри муҳарририни мамлакат президенти Ражаб Тоййиб Эрдўғонни нашр Twitter’и орқали ҳақорат қилганликда гумон қилиб, ҳибсга олди. Бу ҳақда «Коммерсант.ru» хабар бермоқда.
Газета муҳаррири Булент Кенес полиция ходимлари томонидан нашр таҳририятида ҳибсга олинди — бундан аввал полициячилар таҳририят биносида тўлиқ тинтув ўтказиб чиқди.
Туркия полицияси 6 октябрь, сешанба куни Koza-Ipek Media медиагуруҳи офисларида тинтувлар ўтказганди, мазкур компания нашрлари Туркиянинг амалдаги президенти Ражаб Тоййиб Эрдўғонга нисбатан кўп марта танқидий фикрлар билдирганди.
Оқибатда олти журналист террорчиликни молиялаштириш ва тарғиб этиш айбловлари билан ҳибсга олинди. Бир кун аввал худди шундай айбловлар билан Vice News’нинг британиялик икки мухбири қўлга олинган эди.