Калифорния атмосфера ресурслари кенгаши (CARB) Германиянинг Volkswagen концернига ултиматум қўйди. Бу ҳақда «Лига. Новости» хабар бермоқда.
CARB раҳбари Мери Николснинг маълум қилишича, Volkswagen «дизелли можаро»га алоқадор автомобилларни талаб этилган ҳолатга келтириш юзасидан режаларини тақдим этиши учун 2015 йил ноябрига қадар вақт бор. Акс ҳолатда CARB Volkswagen автомобилларидан фойдаланишни таъқиқлаб қўйиши мумкин. Николс, шунингдек, бошқа ишлаб чиқарувчиларнинг машиналари ҳам қўшимча текширувдан ўтказилишини таъкидлади.
АҚШ атроф-муҳитни муҳофаза этиш агентлиги (EPA) вакили 8 октябрь, пайшанба куни Конгрессда бўлиб ўтган эшитувлар чоғида яқин ҳафталар орасида муаммони ҳал этиш вариантлари пайдо бўлиши кутилаётганини билдирган. Концерннинг Америкадаги бўлинмаси раҳбари Майкл Хорн эса тезкор натижаларга умид қилмаслик лозимлиги, вазиятни ўнглаш учун камида икки йил вақт кетишини таъкидлаган.
Бир неча кун аввал Volkswagen келгуси йил январь ойида экологик тестлар билан боғлиқ муаммолар кузатилган 480 мингта автомобиль қайтариб олишини маълум қилган.