Ўзбекистоннинг биринчи ракеткаси Денис Истомин Хитойнинг Шеньжень шаҳрида давом этаётган ATP доирасидаги Shenzhen Open турниридаги иштирокини бошлади. Ушбу мусобақанинг мукофот жамғармаси 668 минг 945 АҚШ долларини ташкил этади, деб хабар беради «Оламспорт».
Афсуски, Истомин илк даврадаёқ чехиялик Лукаш Росолга имкониятни бой бериб қўйди. Бир соату 16 дақиқа давом этган баҳсда Истомин рақибига 6:7(4), 4:6 ҳисобида ютқазди. 29 ёшли Денис дунё рейтингида 60, 30 ёшли Росол эса 80-ўринни эгаллаб турибди.
Ҳар икки теннисчи учрашув давомида 5 тадан эйс зарбасини амалга оширди. Икки теннисчининг ўзаро учрашувларидаги ҳисоб 2:1 га етди, Росол фойдасига. Энди Лукаш Shenzhen Open турнирининг иккинчи даврасида испаниялик Гильермо Гарсия-Лопесга қарши кортга чиқади. Истомин эса бор эътиборини жуфтликдаги иштирокига қаратади.
Изоҳ (0)