Тошкентдаги Республика олимпия захиралари теннис мактаби кортларида теннис бўйича ўтказилаётган Тошкент очиқ чемпионатида бугун, 29 сентябрь куни икки нафар ўзбекистонлик теннисчи баҳсларга киришди. Бу ҳақда Ўзбекистон Миллий олимпия қўмитаси матбуот хизмати хабар бермоқда.
Жумладан, ўтган йилги Tashkent Open турнирида ярим финалга қадар етиб келган Нигина Абдураимова бу йил ҳам ўз олдига юқори мақсадларни қўйганлигини илк учрашувдаёқ намоён этди. Яккалик баҳсларининг биринчи учрашувида хорватиялик Петра Мартичга қарши кортга чиққан Нигина, икки сет якунига кўра, 6:4, 6:0 ҳисобида зафар қучди ва нимчорак финалга чиқди.
Энди Нигина Абдураимова чорак финал йўлланмаси учун турнирда тўртинчи рақам остида сараланган швециялик Жоанна Ларссонга қарши баҳс юритади. WТА таснифида 62-ўринда бораётган Жоанна Ларссон дастлабки турда швейцариялик теннисчи устидан 6:3, 6:3 ҳисобида ғалаба қозонди.
Бугунги баҳсларда кортга тушган яна бир ўзбекистонлик теннисчи Сабина Шарипова эса словакиялик Яна Сепеловага 2:6, 1:6 ҳисобида имкониятни бой берди.
Эслатиб ўтамиз, 28 сентябрь куни бўлиб ўтган баҳсларда Россия вакили Ангелина Габуева билан жуфтликда баҳсларга киришган ўзбекистонлик Влада Екшибарова Сабина Шарипова ва Арина Фольцдан иборат ўзбекистонлик теннисчилар жуфтлигини 6:3, 6:4 ҳисобида мағлуб этди.
Изоҳ (0)