Яманда ҳукуматни қўллаб-қувватловчи кучлар ва исёнчи хусийлар ўртасидаги қуролли низо натижасида камида 2355 нафар тинч аҳоли вакили ҳалок бўлди. Бу ҳақда, БМТнинг Инсон ҳуқуқлари бўйича олий комиссари бошқармаси ҳисоботига асосланиб, «Интерфакс» хабар бермоқда.
Сўнгги икки ҳафта давомида мамлакатдаги жанговар ҳаракатлар сабаб 151 киши ҳалок бўлган. Бу маълумот араб коалицияси самолётларининг Ваҳиджадаги тўй маросимига хатолик сабаб берган авиазарбаси қурбонларини ўз ичига олмаган — биргина ўша ҳужум натижасида 130 киши ҳалок бўлганди.
БМТ олий комиссари бошқармаси Яман ҳукумати ва араб коалициясидан ўрин олган мамлакатларни тинч аҳоли вакилларининг ўлими ҳақидаги хабарларни «мустақил равишда ва ҳиссиётлардан ҳоли» ўрганиш учун имкон беришга чақирмоқда.
Сўнгги маълумотларга кўра, Саудия Арабистони бошлиқ коалиция кучларининг операцияси бошланганидан бери Яманда ҳалок бўлганларнинг умумий сони қарийб 5 минг кишига етган.
Изоҳ (0)