Халқаро футбол федерацияси (ФИФА) президенти Йозеф Блаттер ташкилот билан боғлиқ кетма-кет коррупцияга оид шов-шувларга қарамасдан, ўз лавозимини тарк этишдан бош тортди, дея хабар бермоқда Reuters Блаттернинг адвокатларидан бирига таяниб.
«Блаттер ФИФАдаги ҳамкасбларига ҳукумат билан ҳамкорлик қилаётганини айтиб, қонунга хилоф ҳеч бир иш қилмаганини ва ФИФА президенти лавозимида қолишини таъкидлади», — дейилади адвокат баёнотида.
Шунингдек, адвокат айтишича, УЕФА президенти Мишель Платинига пул ўтказиш ҳақида гапирар экан, Блаттер унинг ФИФА билан 1998 йилдан буён президент маслаҳатчиси сифатида ҳамкорлик қилиб келишини, тўлов эса унинг иши учун берилган қонуний компенсация эканлигини қайд этган.
26 сентябрь куни ФИФА Ахлоқ қўмитаси Блаттер ва Платинига нисбатан текширув бошлагани хабар берилган эди.
Ундан аввалроқ эса Швейцария ФИФА раҳбари Йозеф Блаттерга нисбатан жиноий тергов бошлаган эди. Уни масъулиятсизлик ва мол-мулкни ноқонуний ўзлаштириб олишда айблашмоқда. Блаттер федерация учун фойдасиз бўлган телетрансляция шартномасини тузишда гумон қилинмоқда. Шартнома 2005 йилда КОНКАКАФнинг ўша пайтдаги раҳбари Жек Уорнер билан имзоланган. Бундан ташқари, ФИФА президенти УЕФА раҳбари Мишель Платинига ноқонуний пул ўтказганликда шубҳа қилинмоқда. Бунда гап икки миллион франк ҳақида бормоқда. Ушбу суммани Блаттер 2011 йилда тўлаган.
Изоҳ (0)