Олий Мажлис Қонунчилик палатаси Ахборот ва коммуникация технологиялари масалалари қўмитасида «Телекоммуникациялар тўғрисида»ги қонун ижроси юзасидан олиб борган назорат-таҳлил фаолияти якунига бағишланган кенгайтирилган йиғилиши бўлиб ўтди. Бу ҳақда 28 сентябрь, душанба куни палата матбуот хизмати хабар берди.
Қайд этишларича, қонун ижросини ўрганиш ҳуқуқни қўллаш амалиёти таҳлилига асосан мамлакатнинг Қорақалпоғистон Республикаси ва Тошкент вилоятлари ҳудудларида олиб борилган.
Ўрганиш натижаларига кўра, телекоммуникация соҳасидаги ваколатли орган, давлат ҳокимияти ва бошқаруви органлари томонидан қонун талабларини бажариш мақсадида бир қатор ишлар амалга оширилган.
Хусусан, алоқа инфратузилмаси ва тармоқлари, телекоммуникация технологияларини ривожлантириш борасидаги Дастурлар ишлаб чиқилиб, амалиётга тадбиқ этиб келинмоқда.
«Ўрганиш якунлари бўйича аҳоли кенг қатламларининг манфаати учун хизмат қилувчи миллий ахборот маконини ривожлантириш мақсадида мазкур соҳадаги қонунчиликни, айниқса, «Телекоммуникациялар тўғрисида»ги Қонунини янада такомиллаштиришга оид бир қатор таклиф ва тавсиялар ишлаб чиқилди», — дейилади парламент қуйи палатаси ахборотида.
Изоҳ (0)