Дунёдаги энг муваффақиятли 5 та стартап

Ўз лойиҳангизни бошлашингиз қанчалик яхши истиқболга эга эканлигини кўрсатиб бериш учун IT ва технологиялар соҳасидаги бешта энг муваффақиятли стартапни эсга оламиз.

Facebook

Ҳамма «Ижтимоий тармоқ» фильмини кўрган ва у орқали оддий талаба ҳикояси ҳақида билиб олган бўлса керак? Бугунги кунда Facebook’нинг бир миллиарддан ортиқ фойдаланувчилари бор. Ишонинг, бизнинг акселераторга келадиган стартапчиларнинг 90 фоизи иккинчи Цукерберг бўлиш иштиёқида :)

Uber

2009 йилда Сан-Францискодаги компания такси қидириш, чақириш ва у учун тўловни амалга оширишга мўлжалланган мобил дастур яратди. Ҳозирда лойиҳадан тушадиган ҳафталик даромад 20 миллион доллардан ошади. Айни пайтда Uber дунё бўйича 55 000 дан зиёд ҳайдовчини бирлаштиради ва аста-секинлик билан одатий форматдаги таксини сиқиб чиқармоқда.

Airbnb

2007 йилда асос солинган уй ижараси хизмати инвесторлар томонидан 10 миллиард долларга баҳоланмоқда. Бир пайтлар сан-францисколик икки йигит ижарага олинган квартира ҳақини тўлашга пули етмай қолгач, истовчиларга арзимас тўлов эвазига тунаш учун жой беришга қарор қилади. Ижара учун турар-жой қидириш бўйича жаҳон тармоғи шу тариқа юзага келди.

Dropbox

У файллар алмашиш учун қулай ва тезкор хизматдир. Компания 2007 йилда Массачусетс Технология институти битирувчилари томонидан яратилган. Лойиҳа ғояси флешкасини доим уйда унутиб қолдирадиган йигитга тегишлидир. Айни пайтда компания 10 миллиард долларга баҳоланади.

Snapchat

Хабарлар арвоҳ каби бир пайдо бўлиб, сўнг изсиз ғойиб бўладиган ноодатий мессенжерни Стенфорд университети талабалари яратди. Google лойиҳани 4 миллиард долларга, Facebook эса 3 миллиард долларга сотиб олишни таклиф қилган. Бироқ Snapchat яратувчилари ўшанда таклифларни рад этиб, мустақилликни сақлаб қолишга қарор қилган.

Эътибор беринг, стартапларнинг кўпчилиги талабалар томонидан яратилган. Бўш келманг! :)

Кейинги мақолада Ўзбекистонда қандай стартапларга эҳтиёж борлиги ҳақида сўзлаб берамиз.

Лойиҳа «Дарё» ва StartupFactory.uz томонидан ишга туширилган.