БМТ Хавфсизлик Кенгаши, агар Жанубий Судан ҳукумати ва мухолифати яқинда имзоланган сулҳ талабларига риоя этмаса, мамлакатга нисбатан санкциялар жорий этиш билан яна таҳдид қилди. Бу ҳақда «Ведомости» хабар бермоқда.
Ёпиқ тартибда ўтган маслаҳатлашувлардан сўнг Хавфсизлик Кенгаши Жанубий Судандаги зўравонликларни зудлик билан тўхтатишни талаб қилди.
Жанубий Судан президенти Салва Киир ва собиқ вице-президент Риек Машар қўл остидаги кучлари ўртасидаги сулҳ битими ўтган дам олиш кунлари имзоланган эди. Шундан бери ҳар икки томон мазкур сулҳ талабларини бузишда бир-бирини бир неча бор айблаб чиқди.
Жаҳон сиёсий харитасида пайдо бўлганига атиги тўрт йил бўлган мамлакатдаги низолар 2013 йили бошланган эди. Мамлакат президенти Салва Киир вице-президент Риек Машар ва унинг тарафдорларини давлат тўнтаришига уринишда айблаган эди. Жанговар ҳаракатлар оқибатида, тахминий маълумотларга кўра, 10 мингга яқин одам ҳалок бўлди, 2,2 миллион киши ўз уйини ташлаб чиқишга мажбур бўлди.
Изоҳ (0)