Ўзбекистонда «Тоза ҳаво» тадбирининг биринчи босқичида 120 минг автомобиль текширувдан ўтказилди
Ўзбекистонда 10 августдан автотранспорт воситаларининг атроф-муҳитга салбий таъсирини камайтиришга қаратилган «Тоза ҳаво» тадбирининг иккинчи босқичи бошланди. «Газета.uz»нинг хабар беришича, тадбирнинг биринчи босқичи 10 апрель—10 май кунлари бўлиб ўтганди.
Табиатни муҳофаза қилиш давлат қўмитаси ахборот хизматидан маълум қилишларича, Тошкент шаҳридаги автомобиллар 10 сентябрь—10 октябрь оралиғида текширувдан ўтказилади.
«Тоза ҳаво» тадбири Табиатни муҳофаза қилиш давлат қўмитаси томонидан Ички ишлар вазирлиги Йўл ҳаракати хавфсизлиги бош бошқармаси ҳамда Соғлиқни сақлаш вазирлигининг Давлат санитария-эпидемиология назорати маркази билан ҳамкорликда амалга оширилмоқда.
Автотранспорт воситалари томонидан чиқарилган газларнинг заҳарлилик даражаси ва тутун ҳолати газни таҳлил қилиш ускуналари ёрдамида текширилади. Ҳисоблаш натижалари баённомага киритилади, кўрсаткичлар белгиланган талаблардан ошиб кетган бўлса, автотранспорт воситаси эгасига нисбатан маъмурий чоралар кўрилади. Камчиликларни бартараф этиш учун тегишли кўрсатмалар берилади.
Қўмита ахборот хизматининг алоҳида қайд этишича, автотранспорт корхоналари, техник хизмат кўрсатиш станциялари ва автобилларни таъмирлаш муассасаларини текширишга алоҳида эътибор қаратилади.
«Тоза ҳаво» тадбирининг биринчи босқичи давомида 120 мингга яқин автотранспорт воситалари, 37 та автотранспорт корхонаси, 16 та автомобилларга ёқилғи қуйиш шохобчаси ва 4 та техник хизмат кўрсатиш станцияси текширувдан ўтказилганди.
