Таниқли киноактёр Жавоҳир Зокиров «Сотқин» фильмининг давоми суратга олиниши мумкинлигини маълум қилди, деб хабар бермоқда «1news.uz». Актёр ушбу фильмдаги Ғулом образини ижро этар экан, бундай одамларни содда, довдир қилиб кўрсата олмаслигини таъкидлади.
«Чунки бундай ифлослар одамларни жуда яхши биладиган психолог бўлади. Хўш, Ғуломни ўта олифта қилиб кўрсатганимизнинг сабаби нима? Бу одамлар қандай қилиб ичимизга кириб олиши-ю, қандай қилиб ишини бажариб кетишини халқимиз билсин. Ҳаётда энг кучли одамлар энг оддий одамлар бўлади. Кучлилар Ғуломга ўхшаб спектакль қўйиб бировларнинг устидан кулмайди.
Бугун ёшларимиз кўпинча одамларнинг машинаси, гапирадиган гапи, пулига эътибор беради, аслида эса одамнинг ички дунёсига эътибор бериш керак. Ғулом образи орқали ‘одамлар, огоҳ бўлинглар, бунақа ифлосларга алданманглар, буларнинг охири вой’ демоқчи эдим», – деди у «Даракчи» нашрига берган интервьюсида.
Актёр фильмда Ғуломни қамоққа олмасдан, қочириб юборишдан мақсад нима эканлигига ойдинлик киритди. «Фильмда Ғулом қўлга тушганида анча ишонарсиз бўлиб қолиши мумкин эди. ‘Шундай одамлар ҳалиям орамизда юрибди, улардан огоҳ бўлинглар’ деган мақсадда уни ‘қочириб юбордик’. Кўпгина мухлислар фильмнинг давомини кутяпти. Билмадим, эҳтимол давоми ҳам бўлиши мумкин», – дейди Жавоҳир Зокиров.
Изоҳ (0)