Венгрия миллий тергов бюроси ходимлари Микшольц шаҳри яқинидаги Никладхаза қишлоғининг икки фуқаросини қалбаки АҚШ доллари ва Украина гривнасини тайёрлашда айблаб, ҳибсга олди. Бу ҳақда «Корреспондент.net» хабар бермоқда.
Қўлга олинганларнинг кўрсатмасидан маълум бўлишича, улар жорий йил бошидан бери Микшольц шаҳридаги хусусий босмахонада фаолият олиб борган. Қалбаки пулларга буюртма Украинадан олинган ва уларни асосан шу давлат ҳудудида ўтказиш режалаштирилган.
Тинтувлар чоғида терговчилар юқори сифатли 20 долларли купюралар чоп этилган 1826 дона махсус варақ топган. Жиноятчилар уларнинг ўзидан 123 миллион форинт (440 минг доллар) даромад кўриши мумкин бўлгани айтилмоқда. Қалбаки долларлар босилган ва 200 гривнали купюраларни чоп этиш учун тайёрлаб қўйилган жиҳозлар ҳамда хом-ашё полиция томонидан мусодара этилди.
Изоҳ (0)