Франция ташқи ишлар вазири Лоран Фабиус 29 июль куни ташриф билан Эрон пойтахти Теҳрон шаҳрига келди, деб хабар бермоқда «ТАСС». Бу Франция ТИВ раҳбарининг сўнгги 12 йил ичида Эронга уюштирган илк ташрифидир.
«Бу — муҳим ташриф. Биз икки муҳим мустақил давлатмиз, иккита буюк цивилизациямиз. Сўнгги йилларда барчага маълум сабабларга кўра алоқалар ҳақиқатан ҳам ёмонлашганди, бироқ энди ядро дастури бўйича келишув эвазига кўп нарса ўзгаради.
Менинг ташрифим мамлакатларимиз ўртасидаги янги муносабатларнинг бошланиши бўлади. Эрон ҳам, Франция ҳам минтақада тинчлик ва барқарорликни ўрнатиш учун қатор мажбуриятларга эга. Мен Эрон президенти учун жорий йил ноябрида Францияга ташриф буюриш таклифи ёзилган мактуб олиб келдим», —деди Фабиус.
Франция ташқи ишлар вазири Теҳронда Эрон президенти Ҳасан Руҳоний, ташқи ишлар вазири Муҳаммад Жавод Зариф, нефть вазири Бижан Намдар Зангане, саноат, шахталар ва савдо вазири Муҳаммад Ризо Неъматзода, Эрон вице-президенти ва Атроф-муҳит муҳофазаси ташкилоти раҳбари Маъсума Эбтекар билан учрашади. Қайд этилишича, сентябрь ойида француз компаниялари вакиллари делегациясининг Эронга расмий ташрифи уюштирилади.
Изоҳ (0)