Ўзбекистон ёшлар терма жамоаси футболчиси Сардор Юсупов яқин кунлар ичида Каталониянинг «Барселона» жамоасига ўтиб кетишга яқин турибди, деб ёзади «Uff.uz».
1997 йил 22 январда туғилган Сардор Юсупов 5 ёшидан бери футбол билан шуғулланиб келади. 8 ёшлигида «Пахтакор» академиясида ўйнаб юрган вақтида голландиялик тадбиркор уни Голландиянинг машҳур «Фейенорд» академиясига таклиф қилади. Унинг ўйини, клуб раҳбарларга маъқул келган, аммо Сардорнинг отаси Икром Юсуповга Голландия қироллиги фуқаролигини таклиф қилишганида, у таклифни рад этади ва ота-бола Тошкентга қайтади.
Сардор 15 ёшга тўлганида ота-бола Каталонияга боради. Юсупов маҳаллий «Севилья Олимпик» жамоаси машғулотида бир бора иштирок этганидан кейин унга клуб шартнома таклиф қилади. Ярим ҳимоячи позициясида тўп сурадиган Сардор уч йил ичида Каталония чемпионатида 31 та тўп киритиб, жамоа етакчиларидан бирига айланди ва кўплаб скаутларнинг эътиборига тушди.
Истеъдодли футболчи айни вақтда Тошкентда бўлиб турибди. Сардорни Каталонияда «Сан-Андрео», «Эспаньол», «ДАМ», «Хорта» каби клублар қучоқ очганча шартнома билан кутиб турибди. Лекин, уни «Барселона» ҳам кутмоқда. Яқин орада «Барселона»га Хуан Лапортанинг президент этиб тайинланиши кутилмоқда. Лапортанинг энг яқин ёрдамчиси Сардорни гап-сўзсиз «Барселона» ёшлар жамоасига олишга ваъда берган.
Агар Лапорта президент этиб тайинлана олмаса, Сардор 18 июль куни расман «Барселона» кўригидан ўтади. Чунки, уни аллақачон «Барселона» расмийлари кўрикка чақирган.
Сардор Юсупов яқин кунларда отаси билан бир йилга Барселонага йўл олади. Уларнинг бир йил давомида яшаши учун харажатларини қоплаш учун Uff.uz нашри футболчининг тақдирига бефарқ бўлмаган тадбиркорларни ҳамкорликка чорлади.
https://youtu.be/f9lj1irCkJQ
Изоҳ (0)