O‘zbekiston yoshlar terma jamoasi futbolchisi Sardor Yusupov yaqin kunlar ichida Kataloniyaning “Barselona” jamoasiga o‘tib ketishga yaqin turibdi, deb yozadi “Uff.uz”.
1997-yil 22-yanvarda tug‘ilgan Sardor Yusupov 5 yoshidan beri futbol bilan shug‘ullanib keladi. 8 yoshligida “Paxtakor” akademiyasida o‘ynab yurgan vaqtida gollandiyalik tadbirkor uni Gollandiyaning mashhur “Feyenord” akademiyasiga taklif qiladi. Uning o‘yini, klub rahbarlarga ma’qul kelgan, ammo Sardorning otasi Ikrom Yusupovga Gollandiya qirolligi fuqaroligini taklif qilishganida, u taklifni rad etadi va ota-bola Toshkentga qaytadi.
Sardor 15 yoshga to‘lganida ota-bola Kataloniyaga boradi. Yusupov mahalliy “Sevilya Olimpik” jamoasi mashg‘ulotida bir bora ishtirok etganidan keyin unga klub shartnoma taklif qiladi. Yarim himoyachi pozitsiyasida to‘p suradigan Sardor uch yil ichida Kataloniya chempionatida 31 ta to‘p kiritib, jamoa yetakchilaridan biriga aylandi va ko‘plab skautlarning e’tiboriga tushdi.
Iste’dodli futbolchi ayni vaqtda Toshkentda bo‘lib turibdi. Sardorni Kataloniyada “San-Andreo”, “Espanyol”, “DAM”, “Xorta” kabi klublar quchoq ochgancha shartnoma bilan kutib turibdi. Lekin, uni “Barselona” ham kutmoqda. Yaqin orada “Barselona”ga Xuan Laportaning prezident etib tayinlanishi kutilmoqda. Laportaning eng yaqin yordamchisi Sardorni gap-so‘zsiz “Barselona” yoshlar jamoasiga olishga va’da bergan.
Agar Laporta prezident etib tayinlana olmasa, Sardor 18-iyul kuni rasman “Barselona” ko‘rigidan o‘tadi. Chunki, uni allaqachon “Barselona” rasmiylari ko‘rikka chaqirgan.
Sardor Yusupov yaqin kunlarda otasi bilan bir yilga Barselonaga yo‘l oladi. Ularning bir yil davomida yashashi uchun xarajatlarini qoplash uchun Uff.uz nashri futbolchining taqdiriga befarq bo‘lmagan tadbirkorlarni hamkorlikka chorladi.
https://youtu.be/f9lj1irCkJQ
Izoh (0)