Германиялик полициячи юк машинаси ҳайкалига жарима ёзди

Германиянинг Карлсруэ шаҳрида жойлашган машҳур «Юк ташувчи» ҳайкалига жарима ёзилди. Бу ҳақда TJ хабар бермоқда.

Йўл хизмати назоратчиси томонидан ёзилган жаримага асосан, транспорт воситасининг эгаси нотўғри жойда автомобилни тўхтатиб, қолдириб кетгани учун 30 евро тўлаши керак.

Австриялик рассом Эрвин Вурм томонидан ишланган «Юк ташувчи» ҳайкали Mercedes MB 100D автомобилидан тайёрланган. Унинг кузови шу қадар букилганки, олд тарафи ерга параллел, орқа ғилдираклари эса ён томондаги бино деворига таяниб туради.

Инсталляция Карлсруэнинг 300 йиллик юбилейи шарафига ўрнатилган. Автомобиль шаҳар Санъат ва медиатехнологиялар маркази (ZKM) кўргазмасининг бир қисми ҳисобланади.

ZKM вакилларининг тасдиқлашларича, юк машинасига ҳақиқатан ҳам жарима ёзилган, бироқ полициячи бу вазиятда ҳазиллашган, чунки инсталляциянинг ўрнатилиши ҳақида шаҳар маъмурияти олдиндан огоҳлантирилган эди.

Автомобиллар деформацияси Вурмнинг энг машҳур ижодий услубларидан бири ҳисобланади. Унинг бундай асарлари орасида букилган Volkswagen, шунингдек, «шиширилган» қизил Porsche кабилар бор.