«Юра даври олами» фильми рекорд даражада қисқа муддат ичида бир миллиард доллар ишлади

«Юра даври олами» филмининг умумий касса йиғимлари халқаро прокатга чиққанининг 13-кунидаёқ бир миллиард доллардан ошиб кетди. Nur.kz’нинг хабар беришича, фильм чипталар сотувидан даромад олиш бўйича мазкур фильм янги рекорд ўрнатди.

Бунгача мазкур йўналишда премераси 2015 йил апрелида бўлиб ўтган «Форсаж-7» рекордчи деб ҳисобланаётган эди – ушбу фильм прокатнинг 17-кунида бир миллиард довонни босиб ўтганди.

«Юра даври олами» – 1993 йили «Юра даври хиёбони» фильми билан бошланган динозаврлар ҳақидаги кинофраншизанинг тўртинчи қисмидир. Динозаврлар ҳақидаги мазкур фильмларнинг барчасига Стивен Спилберг алоқадор – дастлабки иккитасига у ўзи режиссёрлик қилган бўлса, кейинги икки фильмда продюсер сифатида қатнашди.

Прокатда фильмнинг фақат биринчи қисми бир миллиард доллардан ортиқ пул ишлай олган. Франшизанинг иккинчи қисми 600 миллион, учинчиси эса 400 миллион долларга яқин пул ишлаган. Барча фильмлар муваффақиятли чиққан, чунки ҳар бири дастлабки харажатларга нисбатан олти-саккиз марта кўп пул келтирган.

«Юра даври олами» фильмини суратга олиш ишлари учун 150 миллион доллар сарфланганди – бу франшизанинг биринчи қисми учун ишлатилган маблағдан 2,5 баробар кўп. Прокатнинг дастлабки икки ҳафтаси давомида фильм ўзини етти карра қоплаб бўлди.