“Yura davri olami” filmining umumiy kassa yig‘imlari xalqaro prokatga chiqqanining 13-kunidayoq bir milliard dollardan oshib ketdi. Nur.kz’ning xabar berishicha, film chiptalar sotuvidan daromad olish bo‘yicha mazkur film yangi rekord o‘rnatdi.
“Yura davri olami” – 1993-yili “Yura davri xiyoboni” filmi bilan boshlangan dinozavrlar haqidagi kinofranshizaning to‘rtinchi qismidir. Dinozavrlar haqidagi mazkur filmlarning barchasiga Stiven Spilberg aloqador – dastlabki ikkitasiga u o‘zi rejissyorlik qilgan bo‘lsa, keyingi ikki filmda prodyuser sifatida qatnashdi.
Prokatda filmning faqat birinchi qismi bir milliard dollardan ortiq pul ishlay olgan. Franshizaning ikkinchi qismi 600 million, uchinchisi esa 400 million dollarga yaqin pul ishlagan. Barcha filmlar muvaffaqiyatli chiqqan, chunki har biri dastlabki xarajatlarga nisbatan olti-sakkiz marta ko‘p pul keltirgan.
“Yura davri olami” filmini suratga olish ishlari uchun 150 million dollar sarflangandi – bu franshizaning birinchi qismi uchun ishlatilgan mablag‘dan 2,5 barobar ko‘p. Prokatning dastlabki ikki haftasi davomida film o‘zini yetti karra qoplab bo‘ldi.
Izoh (0)