Компания Ucell савдо белгиси остида Ўзбекистондаги фаолиятининг 7 йиллигини байрам қилмоқда. Анъаналарга содиқ қолган ҳолда, таваллуд кунига одатда совға-саломлар билан келинади. Компания ҳам юбилей сабаб ўз мижозларини хурсанд этишга қарор қилди. Айнан шу куни, Тошкент шаҳрининг Мирзо Улуғбек туманида жойлашган Ucellнинг абонентларга хизмат кўрсатиш бўйича офиси янгича мазмун ва қиёфада ўз эшикларини очди. Бу ерда пойтахт аҳолиси ва меҳмонлар компаниянинг барча хизмат турларидан фойдаланишлари мумкин.
«Бугун мен ‘Рақамни сақлаш’ деб номланган янги хизмат турига уландим. Узоқ муддатга хорижга кетаётганлигим туфайли бу хизмат ёрдамида ўз телефоним рақамини вақтинча ‘музлатиб’ қўйдим. Ҳаммаси тез, осон ва қулай. Ucell’ни туғилган куни билан қутлайман. У янада юксалиб, бизни ҳудди ҳозирдагидек хайратда қолдиришда давом этаверсин!», — деди Ucell абоненти Антон Литвинов.
Кейинги йилларда Ucell офисларининг услуб ва қиёфаси тубдан ўзгарди. Оддийлик ва шинамлик – улардаги дизайннинг бош хусусиятларидир. TeliaSonera гуруҳи компаниялари барча жойда бир хил кўриниш, услубга эга, ва абонент қайси мамлакатда бўлмасин, унинг учун худди уйидаги каби муҳитни яратади. Гунафша, яъни сиёҳ ранг эндиликда Ucell абонентлари учун тафтли ва қадрдон рангга айланиб қолди.
«Офис шундоққина уйимнинг ёнида жойлашган. Мен бугун ушбу бинога кириб, уни таниёлмай қолдим. Офис жуда ўзгарган, қулайликлар ниҳоятда яхши. Бу ердаги гўзал манзара энг аввало шинам муҳит яратиб, дўстона кайфиятни шакллантиради. Ucell’нинг барча ходимларига бундай ғамхўрлик учун чин юракдан миннатдорчилик билдирмоқчиман», деди Ucell абоненти Диёра Дадашева.
Ucell мамлакатнинг барча ҳудудларидаги мижозлар тармоққа, барча хизмат турларига бирдек ва бир хил сифатли уланиш, тақдим этилаётган тариф ҳамда хизматлар юзасидан маълумот олиш, малакали кўмак олиш имконига эга бўлишларига интилмоқда.
«Бизнинг халқаро тажриба ва маҳаллий ўзига хос билим билан йўғрилган дунёвий етакчилигимиз Ўзбекистондаги фаолиятимизга жуда катта ёрдам беряпти. Бу жиҳат мақбул нарх ва алоқа сифати, шунингдек, мижозга янада яхши хизмат кўрсатиш кабиларда намоён бўлмоқда. Мен Ucell компаниясининг етти йиллиги байрами қувончини бизнинг ҳамкор ва мижозларимиз билан баҳам кўрётганимдан бахтлиман. Ўтган йиллар давомида биз телекоммуникация инфратузилмасига 1 млрд 200 млн доллардан зиёд сармоя йўналтирдик. Биз Ucell мижозлари ҳамма жойда ва ҳамиша мулоқот қилишлари учун навбатдаги қадамларни ташлашга тайёрмиз. Мақсадимиз — телекоммуникация соҳасида халқаро стандартларни жорий этиш, янги иш жойларини яратиш, инсонлар камолотига хизмат қилиш, корхоналар ва компаниялар фаолиятини қўллаб-қувватлаш, замонавий маҳсулотларни тақдим этиш, қулай интернет ва одамлар ҳаётини яхши томонга ўзгартириш. Бугун мен Ucell’нинг барча мижоз ва хамкорларига бизга билдирилган ишонч учун Компания номидан миннатдорчилик билдираман!», — деди Ucell бош директори Тону Грюнберг.
Бугунги кунда компания абонентларга хизмат кўрсатиш бўйича 22 та шахсий офисига эга бўлиб, дилерлик тармоғи 2300 дан зиёд савдо пунктларидан иборатдир. Шунингдек, чекка, тоғли ва бориш қийин бўлган ҳудудлар аҳолисига хизмат кўрсатиш масалалари ечими учун компания 45 та мобил офисларини тақдим этди.
Ucell компаниянинг туғилган куни билан ўз абонентларини муборакбод этади ва ўз танловлари ҳамда ишончлари учун миннатдорчилик билдиради. Барча-барчага саломатлик, фаровонлик тилайди!
Реклама ҳуқуқи асосида
Изоҳ (0)