АҚШ президенти Барак Обама маъмурияти июль ойида Куба билан дипломатик алоқалар қайта тикланганини эълон қилади. Бу ҳақда, ўз манбаларига асосланиб, Reuters агентлиги хабар бермоқда.
Агентлик маълумотларига кўра, АҚШ ва Куба июлнинг биринчи ҳафтасида битим имзолашга умид қилмоқда. Ҳозирга қадар Вашингтон ва Гавана деярли масалалар бўйича келишувга эришиб бўлган ва томонлар қолган муаммолар яқин вақт ичида ҳал этилишига ишонмоқда.
Ҳали очиқ турган масалалар орасида дипломатларнинг Кубада эркин ҳаракатланиши бўйича АҚШнинг талаби, шунингдек, Кубанинг Гаванадаги АҚШ манфаатлари секциясида журналистика ва ахборот технологиялари курслари бўйича сабоқ бермаслик талаби бор.
Музокаралар якунига етганидан сўнг АҚШ давлат котиби Жон Керри Гаванага ташриф буюради ва Америка элчихонаси очилишида иштирок этади. Элчихонанинг айнан қачон очилиши ҳозирча номаълум, Оқ уй Гаванадаги дипломатик ваколатхона қайта ишга тушиши ҳақида Конгрессга яқин икки ҳафта ичида расмий билдиришнома йўллаши кутилмоқда.
Куба ҳукумати ҳам яқин вақт ичида АҚШ билан дипломатик муносабатлар тикланганини маълум қилиши тахмин қилинмоқда.
21 май куни Оқ уй маъмурияти Обама президентлик ваколати якунлангунига қадар Кубага ташриф буюришни режалаштираётганини маълум қилганди – АҚШнинг амалдаги президенти 2017 йил январида Оқ уйни бўшатади.
Изоҳ (0)