«Мистер Бин» ўзининг McLaren F1 спорткарини 12 миллион долларга сотди
«Мистер Бин» роли билан танилган британиялик комик актёр Роуэн Аткинсон ўзининг McLaren F1 суперкарини 12,2 миллион долларга сотди. Бу ҳақда Korrespondent.net хабар бермоқда.
Автомобильга бутун дунёдан харидорлар қизиқиш билдирган, уни британиялик фуқаро сотиб олган. Аткинсоннинг ўзи уни 1997 йили 825 минг долларга сотиб олганди.
«Мистер Бин» мазкур автомобилда икки марта – 2009 ва 2011 йилларда йўл-транспорт ҳодисасига учраган. Сўнгги аварияда актёр хўл йўлда бошқарувни йўқотиб, йўлдан чиқиб кетган ва устунга бориб урилган.
Тўқнашув натижасида McLaren F1 жиддий зарар кўриб, зарбадан сўнг ёниб кетган, Аткинсон эса елкасидан кичик жароҳат олган, холос. Шундан сўнг актёрга Британия тарихидаги энг йирик – 1,4 миллион доллар миқдорида суғурта компенсацияси тўланган.
Эслатиб ўтамиз, McLaren F1 1993 йилдан 2005 йилга қадар жаҳондаги энг тезкор автомобиль ҳисобланган. У 1992 йилдан 1998 йилга қадар атиги 106 дона ишлаб чиқарилган.
