Жанубий Корея шифокорлари сўнгги икки кун ичида ЯШРС-КоВ – Коронавирус томонидан келиб чиққан Яқин Шарқ респиратор синдроми билан касалланган учинчи беморни рўйхатга олишди. Бу ҳақда «РИА Новости» хабар бермоқда.
«Сўнгги ҳолатда вирус аввалроқ MERS (ЯШРС-КоВ) билан зарарланган бемор билан бир палатада яшаган 76 ёшли эркакда қайд этилди», - дейилади Жанубий Корея касалликларни назорат қилиш ва олдини олиш бошқармаси хабарида.
Қайд этишларича, чоршанба куни 76 ёшли эркакнинг ҳарорати кескин кўтарилган. Аввалроқ шифокорларнинг унинг 68 ёшли турмуш ўртоғи ҳам мазкур вирус билан касалланганини тасдиқлашган эди.
Умуман, Жаҳон соғлиқни сақлаш ташкилоти (ЖССТ) шу вақтгача MERS-CoV билан зарарланиш ҳолатларининг 1116тасини аниқлаган бўлиб, 423 ҳолатда вирусни юқтириб олган одамлар ҳалок бўлган. ЖССТ ҳозирча касаллик аниқланган мамлакатларда одамларнинг ҳаракатланишларини чеклаш бўйича тавсия бергани йўқ.
Янги коронавирусли инфекция илк бор 2012 йили Саудия Арабистонида қайд этилганди. Вирус камида тўққиз мамлакатни – Саудия Арабистони, Қатар, Иордания, Франция, Германия, Буюк Британия, БАА, Тунис ва Италияни қамраб олган.
Вирус грипп каби ҳаво-томчи йўли орқали юқади. Ҳозирги вақтда MERS-CoV’га қарши вакциналар мавжуд эмас.
Изоҳ (0)