Австралия жануби-шарқидаги Гоулберн шаҳрида ўргимчаклар ёмғири кузатилди. Бу ҳақда Вести.ru хабар бермоқда.
Хабар беришларича, миллионлаб кичик бўғимоёқлилар Гоулберн шаҳри уйлари томи, ҳовлилари ва кўчаларини кумуш тўр билан қоплаб, эгаллаб олган.
Аҳоли ушбу ҳолатга турлича муносабат билдирган – баъзилар ижтимоий тармоқларда охирзамон келгани ҳақида хабарлар қолдирган бўлса, бошқалар олимлардан ушбу ҳолат тавсифини сўрашган.
Арахнолог Кит Бастерфилднинг сўзларига кўра, ҳар йили май ва август ойларида янги туғилган ўргимчаклар дарахтларнинг имкон қадар юқори қисмига кўтарилиб олиб, тўр ёзишади.
«Шамол уларни тутиб олиб, катта ва узоқ масофаларга учириб кетади. Одатда бундай кўринишдаги миграция катта ҳудудларни қамраб олади, бироқ бу сафар тақдир ҳазили билан ҳаво оқими барча ўргимчакларни бир нуқтага – Гоулберн шаҳрига ёғдирди», - деди олим.
Изоҳ (0)