Saudiya Arabistonining Jidda aeroportida eronlik ziyoratchilarga jinsiy shilqimlik qilganlikda ayblanayotgan aeroportning ikki nafar xavfsizlik ofitserlari ishi bo‘yicha tergov yakunlandi va Saudiya Arabistoni sudiga oshirildi. Bu haqda Eron Haj va ziyorat tashkiloti rahbari Said Uhdiy ma’lum qildi, deb yozadi “TASS”.
U Saudiya Arabistoni tashqi ishlar vazirligidan ularning Jiddadagi konsulligiga bu haqda rasmiy xat kelib tushganini aytdi.
Eron tashkiloti rahbari ta’kidlashicha, islom qonun-qoidalariga muvofiq ayblanuvchilar shafqatsiz jazo olishi kerak.
28-mart kuni Jidda aeroportida xavfsizlik xizmati xodimlari Saudiya Arabistonidan qaytib ketayotgan 14 va 15 yoshdagi eronlik o‘smir ziyoratchilarni jinsiy zo‘rlagan. Bu holat Eronda jiddiy e’tirozga sabab bo‘lib, hatto norozilik namoyishlari ham bo‘lib o‘tgan.
Norozilik namoyishlarining ishtirokchilari Tehrondagi Saudiya Arabistoni elchixonasi va Mashhaddagi konsulligini yopishni, shuningdek, eronliklarning Saudiya Arabistonidagi muqaddas ziyoratgohlarga borishlarini taqiqlashni talab qilib chiqdi.
Shundan so‘ng, ko‘p o‘tmay, rasmiy Tehron ushbu holat bo‘yicha tergov-surishtiruv ishlari yakunlanmaguniga qadar, Saudiya Arabistoniga ziyoratchilarni olib boradigan o‘z laynerlari parvozlarini to‘xtatib qo‘ydi.
Izoh (0)