АҚШ давлат департаменти АҚШ давлат котиби ёрдамчиси Виктория Нуландни Москвага юборди. У 17 май, якшанба куни Россия пойтахтига етиб келиши керак, деб хабар беради «РБК».
Нуланд Москвага Киевдан учиб келади. Украина пойтахтида у мамлакат президенти Пётр Порошенко билан музокара ўтказди. АҚШ давлат департаментининг расмий баёнотида ёзилишича, Нуланд Россияда Минск келишувининг бажарилишини Россиянинг расмий вакиллари билан муҳокама қилади.
Ташриф доирасида Россия ва АҚШ муносабатларининг бошқа жиҳатлари ҳам муҳокама этилади ва фуқаролик жамияти вакиллари билан учрашув ташкил қилинади. Ҳозирча Нуланд айнан кимлар билан музокара олиб бориши айтилмаяпти.
14—16 май кунлари Киевга ташрифи давомида Нуланд Порошенкога «АҚШ Украинанинг ишончли ва содиқ шериги» эканлигини таъкидлади.
Нуланддан олдин Россияга Жон Керри ташриф буюрганди. АҚШ давлат котиби Сочида Россия президенти Владимир Путин билан учрашганди.
Изоҳ (0)