Ўзбекистонда меҳнатга лаёқатсизлик варақалари беришнинг янги тартиби тасдиқланди

Ўзбекистон соғлиқни сақлаш вазири Меҳнатга лаёқатсизлик варақаларини бериш тартиби тўғрисидаги йўриқноманинг янги таҳририни тасдиқлади. Бу ҳақда Norma.uz хабар бермоқда.

Эски йўриқномадан фарқли равишда, янги ҳужжатда меҳнатга лаёқатсизлик варақаси ва меҳнатга лаёқатсизлик маълумотномасига нисбатан аниқ таъриф берилган.

Унга кўра, меҳнатга лаёқатсизлик варақаси шахсни ишдан озод қилиш, вақтинча меҳнатга қобилиятсизлик нафақаси ёки ҳомиладорлик ва туғиш нафақаси тўлаш учун асос бўладиган ҳамда вақтинча меҳнатга лаёқатсизлик билан кечадиган касалланишнинг ҳисоби юритиладиган ҳужжат ҳисобланади. Бу билан фуқароларнинг касаллиги, шикастланганлиги, ҳомиладорлиги, туққанлиги, оиланинг бетоб аъзосини парваришлаганлиги, протез қўйдирганлиги, санаторий-курортда даволанганлиги, шунингдек соғлиғи ҳолатига кўра бошқа ишга ўтказиш учун ва карантин туфайли меҳнатга вақтинча лаёқатсизлигини экспертиза қилиш натижаларига кўра аниқланган меҳнатга вақтинча лаёқатсизлиги тасдиқланади.

Меҳнатга лаёқатсизлик маълумотномаси шахсни ишдан (ўқишдан) озод қилиш учун асос бўладиган ҳамда вақтинча меҳнатга лаёқатсизлик билан кечадиган касалланишнинг ҳисоби юритиладиган ҳужжат ҳисобланади. Қуйидагилар меҳнатга лаёқатсизлик маълумотномаси билан тасдиқланади:

• ўқувчи, талаба, магистрант, клиник ординатор ва катта илмий ходим-изланувчиларнинг ўқишга вақтинча лаёқатсизлиги;
• алкоголга қарамлик натижасидаги касалликлар ва жароҳатлар, шунингдек мастлик натижасида олинган жароҳатлар;
• ходимларни даврий профилактик тиббий кўрикдан ўтказилганлиги;
• ҳарбий хизматга чақирилувчиларни амбулатория ёки стационар шароитда тиббий кўрикдан ўтказилганлиги;
• касалликнинг келиб чиқиши касб билан боғлиқлигини аниқлаш юзасидан текширув ўтказилганлиги;
• айбланувчи ёки судланувчининг суд ажрими билан тиббий муассасага жойлаштирилганлиги;
• амбулатория шароитида ўн тўрт ёшга тўлмаган боланинг парваришга муҳтожлик даври ўн тўрт календар кундан ошганлиги.

Янги йўриқномага мувофиқ, меҳнатга лаёқатсизлик варақалари ва меҳнатга лаёқатсизлик маълумотномалари, қоида тариқасида, давлат соғлиқни сақлаш тизими, шу жумладан, вазирликлар, идоралар ва бошқа давлат ташкилотларига қарашли даволаш-профилактика муассасаларининг даволовчи шифокорлари томонидан берилиши белгилаб қўйилган.

Соғлиқни сақлашнинг хусусий ва бошқа хил тизимларига тегишли даволаш-профилактика муассасалари меҳнатга вақтинча лаёқатсизликни экспертиза қилиш ёки тиббий-меҳнат экспертизаси бўйича етарли малакали ходимга эга бўлган тақдирда, меҳнатга лаёқатсизлик варақалари ва меҳнатга лаёқатсизлик маълумотномалари беришга ҳақли. Айни вақтда, бунда соғлиқни сақлашнинг хусусий тизимидаги даволаш-профилактика муассасаси стационар шароитда фаолият юритаётган бўлиши зарур.

Қуйидаги муассасаларнинг шифокорлари меҳнатга лаёқатсизлик варақаси беришга ҳақли эмас:

• тез тиббий ёрдам ва қон билан ишлаш хизмати;
• шифохоналарнинг қабул бўлимлари;
• суд-тиббий экспертиза муассасалари;
• пансионат ва санаторий-курортлар, сил касалликлари санаториялари бундан мустасно;
• физиотерапия, даволаш физкултураси ва спорт тиббиёти ихтисосликлари бўйича тиббий муассасалар.

Олис ҳудудлардаги даволаш профилактика муассасаларида битта даволовчи шифокор фаолият кўрсатган тақдирда, ушбу шифокор Қорақалпоғистон Республикаси соғлиқни сақлаш вазири, Тошкент шаҳар Соғлиқни сақлаш бош бошқармаси ва вилоят соғлиқни сақлаш бошқармалари бошлиқларининг буйруғига асосан бир ойгача бўлган муддатга меҳнатга лаёқатсизлик варақаси ёки меҳнатга лаёқатсизлик маълумотномаси бериши мумкин. Аввалги йўриқномада бундай тартиб йўқ эди.

Йўриқноманинг тўлиқ кўриниши билан Ўзбекистон Соғлиқни сақлаш вазирлиги сайтида танишиш мумкин.