Facebook’даги «Водители Ташкента» гуруҳи аъзолари Тошкент кўчаларидан бирида автомобиллар билан ёнма-ён ҳаракатланаётган самолёт сурати билан бўлишди. «Бу Тошкент, бизда самолётлар ҳам кўчаларда ҳаракатланади», — дея ҳазиломуз изоҳ ёзди муаллиф.
Воқеанинг бошқа гувоҳлари ҳам ўзлари олган суратларни илова қилди. Фойдаланувчилар ҳодиса юзасидан турлича фикрлар, тахминлар билдирди. Чунончи, кимдир бунга оддий ҳолат деб қараб, авваллари ҳам самолётлар тез-тез шаҳар кўчалари орқали заводдан аэропортга олиб ўтилганини таъкидлаган. Баъзилар эса бунинг эски сурат эканлиги, ҳозирда камералар ўрнатилган устунлар туфайли кўчаларда самолёт юра олмаслигини қайд этган.
Бироқ ўзини вазиятдан яхши хабардор деб атаган фойдаланувчи самолёт ҳаракатланиши учун атайлаб камера ва светофор мачталари олиб ташланганини айтиб ўтди. Унинг ёзишича, суратда Ил-76 акс этган бўлиб, уни таъмирдан сўнг учириб синовчи станцияга элтишмоқда.
Изоҳ (0)