Ўзбекистонлик зиёратчиларнинг илк гуруҳи Умра сафарига кузатилди

9 февраль куни эрталаб ўзбекистонлик умрачиларнинг дастлабки 175 нафар зиёратчиси Умра зиёратини адо этиш учун Саудия Арабистонига кузатилди, деб хабар берилди Ўзбекистон Республикаси Вазирлар Маҳкамаси ҳузуридаги Дин ишлари бўйича қўмитанинг расмий сайтида.

Зиёратчиларнинг Тошкент аэропортидан кузатиш тадбирлари Дин ишлари бўйича қўмита, Ўзбекистон мусулмонлари идораси, мутасадди вазирликлар ва идоралар ходимлари (Умра ишчи гуруҳи) билан биргаликда уюшган ҳолда амалга оширилмоқда.

Жорий йилнинг 9 февралидан 23 март кунига қадар «Ўзбекистон ҳаво йўллари» миллий авиакомпаниясининг замонавий авиалайнерларида ўзбекистонлик зиёратчиларни баҳор ойидаги умра сафарига юбориш режалаштирилган.

Баҳорги умра зиёратида жами 5350 нафар фуқаронинг Тошкент — Жидда — Тошкент йўналиши бўйича сафари 25 та чартер рейсида ташкил этилади.

Зиёратчиларга мавсум давомида ўзбекистонлик 8 нафар ишчи гуруҳи, 107 нафар гуруҳ раҳбари (элликбоши), 27 нафар шифокор ва 4 нафар ошпаз хизмат кўрсатади.

Жорий йилнинг 5 февраль куни зиёратчилар учун меҳмонхона, тиббий марказ, ошхона ва бошқа ташкилий масалаларни ҳал этиш мақсадида 2 нафар ишчи гуруҳи аъзоси Саудия Арабистонига жўнатилди.

Зиёратчилар Макка ва Мадина шаҳрида умра ибодатларини адо етади. Зиёрат 10 кунни ташкил этади (Мадинада 4 кун, Маккада 6 кун). Ўзбекистонлик зиёратчилар истиқомат қилиши учун Мадина шаҳрида «Масжиди набавий»дан 150 метр масофада жойлашган тўрт юлдузли «Фейруз ал-Хайр» меҳмонхонаси, Макка шаҳрида эса «Харам масжиди»дан 2000 метр узоқликдаги «Совфат ал-Мияъд» меҳмонхонаси тайёрлаб қўйилган.

Ўзбекистонлик ҳожилар Мадина шаҳрида 3 кеча-ю 4 кундуз бўлиб, бу ердаги муқаддас қадамжоларни зиёрат қилгандан сўнг Макка шаҳрига йўл олади.