9-fevral kuni ertalab o‘zbekistonlik umrachilarning dastlabki 175 nafar ziyoratchisi Umra ziyoratini ado etish uchun Saudiya Arabistoniga kuzatildi, deb xabar berildi O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mitaning rasmiy saytida.
Ziyoratchilarning Toshkent aeroportidan kuzatish tadbirlari Din ishlari bo‘yicha qo‘mita, O‘zbekiston musulmonlari idorasi, mutasaddi vazirliklar va idoralar xodimlari (Umra ishchi guruhi) bilan birgalikda uyushgan holda amalga oshirilmoqda.
Joriy yilning 9-fevralidan 23-mart kuniga qadar “O‘zbekiston havo yo‘llari” milliy aviakompaniyasining zamonaviy avialaynerlarida o‘zbekistonlik ziyoratchilarni bahor oyidagi umra safariga yuborish rejalashtirilgan.
Bahorgi umra ziyoratida jami 5350 nafar fuqaroning Toshkent — Jidda — Toshkent yo‘nalishi bo‘yicha safari 25 ta charter reysida tashkil etiladi.
Ziyoratchilarga mavsum davomida o‘zbekistonlik 8 nafar ishchi guruhi, 107 nafar guruh rahbari (ellikboshi), 27 nafar shifokor va 4 nafar oshpaz xizmat ko‘rsatadi.
Joriy yilning 5-fevral kuni ziyoratchilar uchun mehmonxona, tibbiy markaz, oshxona va boshqa tashkiliy masalalarni hal etish maqsadida 2 nafar ishchi guruhi a’zosi Saudiya Arabistoniga jo‘natildi.
Ziyoratchilar Makka va Madina shahrida umra ibodatlarini ado yetadi. Ziyorat 10 kunni tashkil etadi (Madinada 4 kun, Makkada 6 kun). O‘zbekistonlik ziyoratchilar istiqomat qilishi uchun Madina shahrida “Masjidi nabaviy”dan 150 metr masofada joylashgan to‘rt yulduzli “Feyruz al-Xayr” mehmonxonasi, Makka shahrida esa “Xaram masjidi”dan 2000 metr uzoqlikdagi “Sovfat al-Miya’d” mehmonxonasi tayyorlab qo‘yilgan.
O‘zbekistonlik hojilar Madina shahrida 3 kecha-yu 4 kunduz bo‘lib, bu yerdagi muqaddas qadamjolarni ziyorat qilgandan so‘ng Makka shahriga yo‘l oladi.
Izoh (0)