Англия олимлари ижтимоий тармоқларда фойдаланувчилар дўстлари сони уларнинг бош мияси ҳажмига боғлиқ эканлигини аниқлади, дея хабар бермоқда «Российская газета». Одамнинг «френдлари» сони қанчалик кўп бўлса, миянинг баъзи зоналаридаги кулранг модда шунчалик катта ҳажмда бўлади.
Мутахассислар 200 киши иштирокидаги тажрибанинг биринчи босқичидан сўнг бундай хулосага келди. Дастлаб магнит-резонанс томографи ёрдамида бош миядаги кулранг модда ҳажми аниқланди. Шундан сўнг иштирокчиларнинг ижтимоий тармоқлардаги дўстлари сони бўйича сўров ўтказилди.
Олинган маълумотларни таққослаш натижасида интернет-дўстлари кўп бўлган (1000 ва ундан кўп) иштирокчиларда бош миянинг ҳиссиётлар учун жавоб берадиган чакка қисми дўстлари кам (300 ва ундан кам) иштирокчилардагидан кўра каттароқ эканлиги аниқланди.
Бироқ бу дўстона фойдаланувчилар «энг ақлли» эканлигини билдирмайди. Олимлар айтишича, баъзан «кўп миқдордаги мия» маълум бир топшириқни бажаришда халақит беради.
Энди британияликлар одамда мия ҳажми ва дўстлар сонининг боғлиқлигини ўрганмоқчи.