Россиялик режиссёрнинг «Левиафан» фильми «Энг яхши хорижий фильм» йўналишида «Олтин глобус»ни қўлга киритди

12 январь куни АҚШнинг Калифорния штати Беверли Хиллз шаҳрида «Олтин глобус» мукофотларини топшириш маросими бўлиб ўтди, дея хабар бермоқда NBC телеканали.

Асосий — «Энг яхши драматик фильм» йўналиши бўйича «Ўспиринлик» (Boyhood) фильми ғолиб бўлди. Ричард Линклейтер шу картинаси учун энг яхши режиссёрлик иши йўналишида мукофот олди.

«Ҳали-ҳамон Элис» (Still Alice) фильмидаги роли учун Жулианна Мур энг яхши драматик актриса; «Стивен Хокинг олами» (The Theory of Everything) картинасидаги ижроси учун эса Эдди Редмейн энг яхши актёр деб тан олинди.

«Энг яхши комедия актёри» йўналишида «Бёрдмэн» (Birdman) фильмида ўйнаган Майкл Китон ғолиб бўлди. Ушбу кинолента сценарийси муаллифлари ҳам мукофот совриндорига айланди. «Катта кўзлар» (Big Eyes) картинасидаги ижроси Эми Адамсга энг яхши комедия актрисаси номини олиб келди. «‘Гранд Будапешт’ меҳмонхонаси» (The Grand Budapest Hotel) эса энг яхши комедияли фильм бўлди.

Энг яхши иккинчи даражали актёрлар «Ўспиринлик» (Boyhood) фильмида ўйнаган Патрисия Аркетт ва «Шайдолик» (Whiplash) картинасида рол ижро этган Жей Кей Симмонс бўлди.

«Аждарни қўлга ўргатиш сирлари 2» (How To Train Your Dragon 2) лентаси энг яхши анимацион фильм деб эътироф этилди.

«Хорижий тилдаги энг яхши фильм» йўналишида россиялик Андрей Звягинцевнинг «Левиафан» картинаси «Олтин глобус»га лойиқ деб топилди.