Термиз шаҳрида Ўзбекистон Республикаси Миллий хавфсизлик хизмати чегара қўшинларининг бир гуруҳ ҳарбий хизматчилари учун 30 хонадонга мўлжалланган уч қаватли замонавий янги уй фойдаланишга топширилди. Бу ҳақда Ўзбекистон Миллий ахборот агентлиги хабар бермоқда.
Шу муносабат билан ташкил этилган маросимда ҳарбий хизматчилар, уларнинг оила аъзолари, давлат ва жамоат ташкилотлари вакиллари, фаол ёшлар ва нуронийлар иштирок этди.
Ўзбекистон Қуролли Кучлари ташкил этилганининг 23 йиллиги ва Ватан ҳимоячилари куни арафасида Термиз шаҳрида фойдаланишга топширилган 30 хонадонга мўлжалланган янги уйда барча шароитлар яратилган. Хоналар кенг, ёруғ, шинам. Ошхона ва бошқа қўшимча хоналар замонавий усулда жиҳозланган. Ҳарбийларнинг фарзандлари учун замонавий ўйин майдончаси, очиқ сув ҳавзаси барпо этилган. Замонавий уй «Саодатбону — Азиза — Термиз» хусусий корхонаси қурувчилари томонидан белгиланган муддатда бунёд этилди. Бунинг учун уч миллиард сўмга яқин маблағ сарфланди.
Тадбирда янги уйнинг калити топширилган чегарачиларнинг фарзандларига байрам совғалари улашилди.
Эслатиб ўтамиз, 2014 йилда Ўзбекистон Республикаси Миллий хавфсизлик хизмати чегара қўшинларида хизмат қилаётган ҳарбийлар оиласи учун 436 хонадонга мўлжалланган янги уй-жойлар қурилиб, фойдаланишга топширилган эди.
Изоҳ (0)