Осиё Кубоги доирасида Ўзбекистон — КХДР терма жамоалари ўртасида кечган учрашувдан сўнг (1:0) матбуот анжумани ўтказилди, деб хабар бермоқда «Uff.uz».
Журналистлар билан мулоқотда аввал Шимолий Корея терма жамоаси бош мураббийи ўз фикрларини билдирди.
Матбуот анжуманига Миржалол Қосимов учрашувнинг энг яхши футболчиси Игорь Сергеев ҳамроҳлигида кириб келди. Мураббий залга кириб келиши билан журналистлар олқишлай бошлади. Мураббийдан анъанавий тарзда ўйин ҳақида фикрлари сўралди.
«Бугунги ўйинда ғалаба жуда муҳим аҳамиятга эга эди. Бундай мусобақаларда мудом ҳис-ҳаяжон бўлади. Аммо биз бугун яхши ўйнадик ва ҳақли равишда ғалабага эришдик. Шу ўринда узоқдан, минглаб километр масофа босиб келган мухлисларга миннатдорчилик билдирмоқчиман. Улар бизга катта мадад бўлмоқда», — деди Миржалол Қосимов.
ОФК ходими томонидан берилган савол: Игорь, бугун сиз ажойиб гол урдингиз ва учрашувнинг энг яхши футболчиси деб тан олиндингиз. Бу ҳақида фикрингиз?
Жавоб: Албатта, бундан жуда мамнунман. Аммо бугун ўйиннинг энг яхши футболчиси бўлишга терма жамоамиздаги ҳар бир футболчи ҳақли эди. Ғалабада жамоадошларимнинг ҳиссаси кўпроқ. Энг муҳими — биз ғалаба қозондик. Демак, ўз олдимизга қўйган мақсадимизга эриша олдик. Биз учун шахсий совриндан кўра, жамоавий ғалаба муҳимроқ.
Австралиялик журналист: Жаноб мураббий, жамоангиз дарвозабони Нестеров сўнгги сонияларда муқаррар голни қайтариб қолди. Бу борада фикрингиз?
Жавоб: Дарҳақиқат ўйиннинг охирги сонияларида рақиб босимни оширди. Игнатий эса маҳорати эвазига кучли зарбани қайтариб қолди. Дарвозабон — ярим жамоа дегани. Бу ғалаба бутун жамоамизнинг ғалабасидир. Биз яхшироқ ўйнадик ва ғалабани ҳақли равишда қўлга киритдик.
Австралиялик журналист: Биринчи бўлимда Шимолий Корея терма жамоаси қарши ҳужумда ўйнади. Бу кутилган услуб эди. Аммо иккинчи бўлимда рақиб ташаббусга эгалик қила бошлади. Бу ҳақида нима дейсиз?
Жавоб: Футболда ҳеч қачон 90 дақиқа давомида прессинг қилиш мумкин эмас. Шу сабабли ўйин услубини ўзгартириб туриш керак. Боз устига кучли жала ёққанини ҳам инобатга олиш керак. Шу сабабли ўйин услубимизни бироз ўзгартирдик. Биз қай томонлама кучлимиз — тўпга эгалик қилиб турганда. Аммо ёмғир туфайли бундай ўйин анча хавфли кўриниш олиши мумкин эди. Шу сабабли бошқачароқ ҳаракат қилдик ва адашмадик деб ўйлайман.
Хитойлик журналист: Аввало, ғалаба билан табриклайман. Келаси турларда Хитойга қарши кечадиган ўйин ҳақида нима дейишингиз мумкин?
Жавоб: Аввал ҳам айтгандим, яна такрорлайман. Бу мусобақадаги ҳар бир жамоа кучли. Ҳозир, сиз билан матбуот анжуманида ўтирган вақтимизда Хитой ва Саудия Арабистони ўртасида ўйин кечмоқда. Бу учрашув анча қизиқарли ўтяпти. Шу сабабли бирор жамоани алоҳида ажратиб кўрсатмаган бўлардим.
ОФК расмий сайти томонидан берилган савол: Жаноб Қосимов, табриклаймиз. Ўйин давомида тўпни назорат қилганингиз рост, аммо рақиб дарвозаси олдида ўзаро пас беришда оқсадингиз. Ҳатто оддий зарба билан гол уриш мумкин бўлганда ҳам имкониятдан фойдалана олмадингиз. Ҳужумдаги бундай муаммолар сизни хавотирга солмайдими?
Жавоб: Албатта, футболда бундай вазиятлардан фойдаланиш керак. Агар биз иккинчи бўлимда яратилган имкониятларни голга айлантира олганимизда, бошқача ҳисоб бўларди. Биз ҳам ҳар бир зарба голга айланишини истаймиз. Аммо футбол ҳам шуниси билан қизиқ бўлса керак. Мен жамоамиз ҳужумида камчилик борлигини инкор этмайман ва бу борада ишлашда давом этамиз. Келаси учрашувларда бу камчиликни тўғрилашга ҳаракат қиламиз.
Хитойлик журналист: Яқинда билдирган фикрингизда Хитой терма жамоаси ўсишга эришгани ҳақида айтган эдингиз. Айтингчи, Хитойга қарши қандайдир махсус тайёргарлик кўрдингизми?
Жавоб: Биз бугунги ўйинни ўтказгунга қадар фақат КХДР ҳақида ўйладик. Энди келгуси учрашувларга тайёрлана бошлаймиз. Бир ўйиндан бошқасига сакраб бўлмайди. Биз навбатдаги рақибга қараб машғулотларни давом эттирамиз.
Австралиялик журналист: 2011 йилда ярим финалга қадар борган эдингиз. Бу сафар ҳам шу натижани такрорлай оласизми?
Жавоб: Агарда яратилган вазиятлардан фойдалансак ва омад биз томонда бўлса, албатта, ярим финалга қадар етиб борамиз.
Ўзбекистонлик журналист Нарзулла Сайдуллаев: Саволим Игорь Сергеевга: Бугунги учрашувда гол урдингиз. Ёшлар ўртасидаги Осиё чемпионатида тўпурар бўлган эдингиз. Бу сафар ҳам шундай ниятингиз борми?
Жавоб: Албатта, тўпурар бўлгим келади. Аммо бу асосий мақсадим эмас. Шундай вазият бўладики, ё зарба бериш, ё жамоадошга тўпни ошириб бериш керак бўлади. Агар шеригим мендан кўра яхшироқ вазиятда бўлса, албатта пас бераман. Аммо зарба бериш зарурияти туғилса, яримта вазиятдан ҳам гол уришга интиламан. Мен учун энг асосийси — жамоам ғалабаси.
Ташкилий қўмита вакили саволи: Максим Шацких терма жамоадан кетгач, Ўзбекистон таркибида ёрқин ҳужумчи кўрмадик. Сергеев Шацкихнинг ўрнини боса оладиган ҳужумчи бўлади, деб айта оламизми?
Миржалол Қосимов: Мен бу борада Игорнинг олдида гапира олмайман, бунинг учун у залдан чиқиб туришига тўғри келади (залда кулгу). Албатта, бу ҳазил эди. Агар Игорь ишлашда давом этса ва ўйинини кучайтириб борса, албатта, Шацких даражасидаги ҳужумчига айланади. Аммо бунинг учун кўп ва астойдил меҳнат қилишига тўғри келади.
Шу билан матбуот анжумани якунига етди.
Изоҳ (0)