Россиянинг «Аэрофлот» авиакомпанияси самолётлари 2015 йил 16 январдан бошлаб, «Москва – Самарқанд – Москва» йўналишида қатнай бошлайди. Бу ҳақда, авиакомпания матбуот хизматига асосланиб, «РИА Новости» ахборот агентлиги маълум қилди, деб хабар бермоқда «Kun.uz».
Хабарда келтирилишича, бу йўналиш бўйича ҳафтасига бир рейсни амалга ошириш режалаштирилган. Бу рейсда «Шереметьево» аэропортининг “D” терминалидан учувчи Airbus 320 русумли самолётдан фойдаланилади.
«Самарқанд шаҳри билан ҳаво йўллари орқали боғланиш авиакомпаниянинг ривожланиш дастурида белгилаб қўйилган эди», – дея маълум қилган «Аэрофлот» компанияси вакилларидан бири.
Маълумот учун, «Аэрофлот» авиакомпанияси шу вақтгача «Москва – Тошкент – Москва» йўналиши бўйича қатновларни амалга ошириб келади.
Ноябрь ойи охирида Ўзбекистон ва Россия вакилларини ўртасида ўтказилган иқтисодий ҳамкорлик бўйича мажлисда икки давлат ўртасидаги транспорт алоқалари бўйича масалалар ҳам ҳал қилинган ва ўша учрашувдаги муҳокамалар натижасида, Ўзбекистон томони «Аэрофлот» компаниясига «Москва – Самарқанд – Москва» йўналишида парвозларни йўлга қўйиш учун рухсат берган, эвазига эса «Ўзбекистон ҳаво йўллари» авиакомпанияси «Тошкент – Владивосток – Тошкент» йўналишида учишларни амалга ошириш ҳуқуқини қўлга киритган.
Изоҳ (0)