«Ижтимоий фикр» маркази «Ўзбекистон аёллари – 2014: ижтимоий мавқе ва кайфият» мавзусида сўров ўтказди
Яқинда «Ижтимоий фикр» жамоатчилик фикрини ўрганиш маркази томонидан «Ўзбекистон аёллари – 2014: ижтимоий мавқе ва кайфият» номи остида сўров ўтказилди. Бу ҳақда «Жамият» газетасида чоп этилган мақола марказ сайтида эълон қилинган.
Сўровда иштирок этганларнинг 92 фоизидан ортиғи ўзи ва оиласи давлатимиз томонидан ижтимоий ва моддий қўллаб-қувватланаётганини билдирган.
Сўров натижасида хотин-қизларнинг ижтимоий-сиёсий фаоллиги ўтган йилларга қараганда анча юқори экани маълум бўлди. 91,3 фоиз иштирокчи хотин-қизларнинг ижтимоий-сиёсий фаолиятини ижобий баҳолади ва мамлататимизда ҳаётга татбиқ этилаётган ислоҳотлар иштирок этишни ўзининг муҳим ва дахлсиз ҳуқуқи деб билишини маълум қилган. Шунингдек, уларнинг таъкидлашича, ҳудудий бошқарув органлари, фуқаролар йиғинлари, сиёсий партиялар, касаба уюшмалари ва нодавлат нотижорат ташкилотлари фаолиятида хотин-қизлар кенг қатнашмоқда.
Иштирокчиларнинг фикрича, замонавий аёл ўқимишли, жумладан, олий маълумотли бўлиши муҳим аҳамиятга эга. Зеро, бу хотин-қизларимиз мавқеининг янада юксалиши, турли давлат идораларида ишлаши учун асосий мезонлардан бири хисобланади.
Ижтимоий сўров иштирокчиларининг ярмидан кўпи ўз йўлини тўғри танлагани ва бу билан фахрланишини билдирди. Хотин-қизлар касб танлашда эркаклар билан тенг имкониятга эга. Уларнинг аксарияти меҳнат соҳасида ўзини тўлиқ ҳуқуқий ҳимояланган, деб ҳисоблайди ва асосий иш жойида яратилган меҳнат шароитларида мамнунлигини билдирган.
Тадқиқот давомида яна маълум бўлдики, иштирокчилар корхона ва ташкилотларда хотин-қизлар қўмитаси бошланғич ташкилоти ташкил этилишини қўллаб-қувватлайди. Уларнинг фикрича, бу ташкилот хотин-қизларга кундалик муаммоларини ҳал этишда ёрдам бермоқда, меҳнат қилаётган хотин-қизлани ижтимоий ҳимоя қилиш ва қўллаб-қувватлашнинг амалий воситасига айланиб бормоқда.
