2014 йилнинг тўққиз ойида Ўзбекистон спортчилари жами 625 медални қўлга киритди

Ўзбек Миллий академик драма театрида Ўзбекистон Республикаси Маданият ва спорт ишлари вазирлиги томонидан «Маданият ва спорт: ташаббус ва таҳлил» мавзусида матбуот анжумани ўтказилди. Бу ҳақда Ўзбекистон Миллий ахборот агентлиги хабар бермоқда.

Ўзбекистон Республикаси маданият ва спорт ишлари вазирининг ўринбосари Д. Муллажонов ва бошқалар Президент Ислом Каримов раҳнамолигида навқирон авлод маънавиятини юксалтириш, уларни ҳеч кимдан кам бўлмаган инсонлар этиб вояга етказиш, миллий маданият ва санъатни, спортни равнақ топтириш, истеъдод соҳибларини ҳар жиҳатдан қўллаб-қувватлаш ва рағбатлантириш масаласига алоҳида эътибор қаратилаётганини таъкидлади.

Соғлом бола йилида вазирлик тизимида Ўзбекистон Бадиий жамоалари ижодий бирлашмаси, Ўзбекистон Миллий симфоник, камер ва халқ чолғулари оркестрлари бирлашмаси, Фарғона Театр-концерт саройи, Ёшлар маданият ва санъат маркази, Шахмат бўйича республика ихтисослаштирилган болалар ва ўсмирлар спорт мактаби, Гулистон олимпия захиралари коллежи, Миллий спорт турларини ривожлантириш республика маркази, Жисмоний тарбия ва спорт бўйича мутахассисларни илмий-методик таъминлаш, қайта тайёрлаш ва уларнинг малакасини ошириш маркази каби янги субъектлар ташкил этилди.

Мамлакатнинг барча ҳудудларида замонавий маданият ва аҳоли дам олиш марказлари барпо қилинмоқда. Бу йил 24 маданият ва аҳоли дам олиш маркази, 22 маданият ва истироҳат боғи фойдаланишга топширилгани бунинг тасдиғидир.

Давлат раҳбарининг 2014 йил 22 январдаги «Ўзбек Миллий академик драма театрининг 100 йиллигини нишонлаш тўғрисида»ги қарорига мувофиқ театрнинг моддий-техник базаси тубдан янгиланиб, ижодкор ва томошабинлар учун янада қулай, замонавий шароит яратилди. Миллий театр тарихи, бугунги куни ҳақида ҳикоя қилувчи ҳужжатли фильм, альбом-китоб ўзбек, рус ва инглиз тилларида нашр этилди. «Ўзбекистон театр санъати: тарих, тараққиёт ва истиқбол» мавзуида илмий-амалий конференция ўтказилди.

Жорий йилда вазирлик ва бир қатор ҳамкор ташкилотлар томонидан «Ёшлик баҳори» ёш опера ижрочилари республика фестивали, Competizione dell'Opera опера ижрочилиги халқаро танлови ўтказилди.

«Музейлар — бой тарихимиз ва бетакрор маданиятимиз хазинаси» мавзуидаги маърифий ойлик ёшларнинг музейлар фаолиятига оид билимларини янада бойитиш ва мустаҳкамлашга ҳисса қўшди. «Ягонасан, муқаддас Ватан!» анъанавий кўрик-танлови Ўзбекистон ҳақидаги энг яхши қўшиқларни яратиш, унинг ижрочиларини аниқлаш билан бирга ижодкорлар ўртасидаги ҳамкорликни янада мустаҳкамлади. «Биз, Ватан фарзандлари – умид ниҳолларимиз» шиори остидаги концертлар, «Созлар навоси» ёш мусиқачилар республика танлови мусиқа ихлосмандларида катта қизиқиш уйғотди.

2014 йил Ўзбекистон спортида ҳам унутилмас воқеаларга бой бўлди. Жорий йилнинг 9 ойи мобайнида Олимпия ва миллий спорт турлари бўйича ўтказилган 177 халқаро мусобақада Ўзбекистон спортчилари 186 олтин, 200 кумуш, 239 бронза, жами 625 медални қўлга киритди.

Матбуот анжуманида оммавий ахборот воситалари ходимларининг саволларига атрофлича жавоб қайтарилди.