Ўзбекистон бўйлаб тадбиркорларни алдаб, жами 500 миллион сўмдан ортиқ маблағни ўзлаштирган фирибгар қўлга олинди

Тошкент шаҳри, Қорақалпоғистон Республикаси ва Қашқадарё вилоятида бир қанча тадбиркорларнинг ишончига кириб, уларнинг маблағларини ўзлаштириб кетган фирибгар қўлга олинди, деб хабар бермоқда «На посту» газетаси.

Дастлаб ўзини Нукусдаги йирик ун маҳсулотлари ишлаб чиқарувчи корхона вакили сифатида таништирган фирибгар тез пишувчи лағмон ишлаб чиқариш билан шуғулланувчи тадбиркор билан 66 миллион сўмга шартнома тузади. Келишилган маҳсулотни олгач, уни тезда паст нархларда савдо нуқталарига нақд пул эвазига тарқатиб, ғойиб бўлади.

Кейин эса Тошкентга келган товламачи пойтахтда вақтинчалик рўйхатдан ўтади. Бу ерда у ун ва ун маҳсулотлари савдоси билан шуғулланувчи тадбиркор билан танишиб, икки ҳафтада унинг ҳам ишончига кириб олади. Тадбиркор деярли бутунлай нотаниш бўлган бу шахсга 85 миллион сўмлик қийматга эга турли навдаги унларни топширади. Фирибгар бу сафар ҳам маҳсулотни тезда сотиб, тадбиркорнинг кўзига бошқа кўринмайди.

Товламачи Тошкент шаҳри, Қорақалпоғистон Республикаси ва Қашқадарё вилоятида бу турдаги «операция»ларнинг бир нечтасини амалга оширишга улгуради. Тадбиркорлардан келиб тушган шикоятлар натижасида Тошкент вилояти туманларидан бирининг Ички ишлар бўлими томонидан фирибгарга нисбатан қидирув эълон қилинади. Тошкент шаҳри Юнусобод туманидаги танишларидан бирининг уйидан топилган товламачи қўлга олинган.

Тергов жараёнида ўз айбини тан олган асли Қозоғистон Республикасида туғилган фирибгар яна 12 та шундай жиноятни содир этгани аниқланган. Ушбу фирибгарлик ҳолатлари натижасида фуқароларга жами 500 миллион сўмдан ортиқ зарар етказилган. Эндиликда фирибгарни ўз жиноятига яраша жазо кутмоқда.