2014 йил 21 ноябрь куни Тошкент шаҳрида ахборот-коммуникация технологияларига бағишланган Ўзбекистон — Япония семинари бўлиб ўтди. Бу ҳақда Ўзбекистон Республикаси Алоқа, ахборотлаштириш ва телекоммуникация технологиялари давлат қўмитасининг расмий сайтида хабар берилди.
Семинар Ўзбекистон Республикаси Алоқа, ахборотлаштириш ва телекоммуникация технологиялари давлат қўмитаси ҳамда Япония Ички ишлар ва коммуникациялар вазирлиги ўртасида жорий йилнинг январь ойида имзоланган ахборот-коммуникация технологиялари соҳасида ўзаро ҳамкорлик тўғрисидаги меморандумни амалга ошириш доирасида ташкил этилди.
Тадбирда вазирликлар, идоралар ва Ўзбекистондаги олий таълим муассасалари вакиллари билан бир қаторда Токио ва Кейо университетлари, Япония ахборот-коммуникация технологиялари Миллий университети, Япониянинг NEC корпорацияси вакиллари ҳам иштирок этди.
Семинарнинг биринчи — ахборот-коммуникация технологиялари соҳасида таълимга бағишланган қисмида тадбир иштирокчилари Ўзбекистон ва Япониядаги етакчи ОТМлари (хусусан, Токио ва Кейо университетлари)нинг ахборот-коммуникация технологиялари соҳасида халқаро стандартларга жавоб берадиган юқори малакали мутахассислар тайёрлашда тўплаган тажрибалари билан танишди.
Тадбирнинг иккинчи — ахборот-коммуникация технологияларидан фойдаланган ҳолда ижтимоий ва иқтисодий ривожланишга бағишланган қисмида эса ахборот-коммуникация технологиялари инфратузилмасини мукаммаллаштириш, соғлиқни сақлаш, таълим, табиий офатлар билан курашиш сингари соҳаларга жорий этиш ва бошқа мавзулар бўйича тайёрланган маърузалар тингланди.
Изоҳ (0)