Япония ҳукумати Путиннинг расмий ташрифини бекор қилди

Япония ҳукумати Владимир Путиннинг мамлакатга жорий йилнинг кузига режалаштирилган ташрифидан воз кечди. Бу ҳақда Япониянинг Sankei Shimbun газетасига таяниб Segodnya.ua хабар бермоқда.

Газета манбалари тақдим этган маълумотга кўра, Япония бош вазири Синдзо Абэ Путин билан ноябрда Пекиндаги Осиё-Тинч океани иқтисодий ҳамкорлиги саммитида учрашади.

Кузги ташриф ҳақидаги келишувга февраль ойидаёқ эришилган, бироқ Қрим Россия ихтиёрига ўтгач, Япония ҳукумати апрелга белгиланган Япония ташқи ишлар вазири ташрифини кечиктирган, шунингдек августга режалаштирилган Россия-Япония консультацияларини ҳам бекор қилган эди.

Ноябрда бўладиган учрашувда бош вазир Абэ Путиндан Россия-Япония сиёсий музокараларини янгилаш учун Украинадаги низоларни тинч йўл билан ҳал қилишни сўрамоқчи.