Швеция ташқи ишлар вазири Марго Вальстрём расмий Стокгольмнинг Фаластинни давлат сифатида тан олишига нисбатан Оқ уй томонидан қилинган танқидларга жавобан мамлакати ташқи сиёсати АҚШга боғлиқ эмаслигини маълум қилди, деб хабар бермоқда «РИА Новости».
«Бизнинг сиёсатимизни АҚШ белгиламайди. Биз бундай танқидни кутгандик. Биз ушбу қароримизнинг асослари ва сабабларини тушунтириш учун АҚШ билан конструктив руҳдаги диалогни давом эттирамиз», − деди вазир.
Жума куни Швециянинг янги Бош вазири Стефан Лёвен томонидан Фаластинни давлат сифатида тан олиш истаги борлиги эълон қилиниши Вашингтоннинг кескин танқидига сабаб бўлган эди. АҚШ Давлат департаменти вакили Жен Псаки Фаластинни давлат сифатида тан олишга ҳали эрта эканлигини таъкидлаган.
БМТ Бош Ассамблеяси Фаластинга «кузатувчи давлат» мақомини берган ва фаластинликларнинг Исроил томонидан 1967 йилда эгаллаб олинган ҳудудлар доирасида ўз давлатини қуриш ҳуқуқини тасдиқлаган. Бироқ Европа Иттифоқи ва унинг аъзолари Фаластинни мустақил сифатида тан олмай келади.
Изоҳ (0)