GM Uzbekistan янги моделларни ишлаб чиқаришга 150 млн доллар йўналтиради

GM Uzbekistan 2015—2020 йилларда янги моделларни ишлаб чиқаришга 150 миллион доллар йўналтиради, дея хабар бермоқда UzDaily «РИА Новости»га таяниб.

Нашр манбаси сўзларига кўра, гап учта янги модель ҳақида бормоқда. «150 миллион доллар — бугунги кунда режалаштирилаётган инвестициялар, уларнинг ҳажми ўзгариши мумкин», — дея аниқлик киритди агентлик суҳбатдоши.

Унинг айтишича, 2016 йилда Gentra бизнес-класс седани рестайлингини амалга ошириш, 2017 йилда Aveo модели базасида B синфидаги хэтчбекни серияли ишлаб чиқаришни йўлга қўйиш, 2018 йилдан сўнг эса кроссовер йиғишни бошлаш кўзда тутилган.

Аввалроқ 2015 йилнинг биринчи ярмида GM Uzbekistan кичик синфдаги Chevrolet Aveo автомобилини SKD (semi knocked down — ярим бўлакланган автомобилларни йиғиш) турида йиғишга киришиши мумкинлиги хабар берилган эди. Дастлабки босқичда йиғиш линиясининг қуввати йилига 20 мингтагача автомобилни ташкил этиши мумкин.