Ўзбекистонда Chevrolet Аvео автомобилини ишлаб чиқариш бошланади
«Ўзавтосаноат» акциядорлик компанияси вакиллари General Motors Uzbekistan Ўзбекистон-Америка қўшма корхонасида янги Т250 (Chevrolet Аvео) моделидаги автомобилларни серияли ишлаб чиқаришни ташкил этиш бўйича лойиҳани амалга оширишга киришди, дея хабар бермоқда 12news.uz.
Ҳукумат қарори билан лойиҳани амалга ошириш ишлари дастлабки техник-иқтисодий асосларсиз бошланади, технологик қурилма ва жиҳозлар эса тендер савдолари ўтказмасдан, General Motors компаниясининг савдо-сотиқ глобал тизими орқали шартнома тузиш йўли билан сотиб олинади.
Ҳужжат «Ўзавтосаноат» АКга икки ой муддатда лойиҳанинг техник-иқтисодий асосини ҳукуматга тасдиқлаш учун тақдим этиш вазифасини юклайди.
Нашрнинг эслатишича, 2013 йил ноябрида GM Uzbekistan Daewoo Gentra, 2014 йил мартида эса Chevrolet Orlando ишлаб чиқаришга киришди. Яқин икки йил ичида Nexia автомашинасини ҳам бутунлай янгилаш режалаштирилмоқда.
GM Uzbekistan қўшма корхонаси 2014 йилнинг биринчи ярмида 127 774 та автомобиль ишлаб чиқарди, бу 2013 йилнинг шу давридаги кўрсаткичдан 6,3 фоизга кўп демакдир. Ўзбекистон Давлат статистика қўмитаси маълумотларига кўра, олти ой ичида 29 699 та Nexia, 7267 та Matiz, 9702 та Damas, 337 та Lacetti, 14 828 та Spark, 3476 та Captiva, 2309 та Malibu, 32 639 та Cobalt, 26 953 та Gentra ва 563 та Orlando моделидаги автомобиллар ишлаб чиқарилган.
