«Тошкент — Андижон», «Тошкент — Наманган», «Тошкент — Фарғона» ва «Тошкент — Қўқон» такси йўналишларини очиш борасида тайёргарлик ишлари амалга оширилди ва мазкур йўналишларнинг шу йил август ойи бошида ишга туширилиши режалаштирилмоқда. Бу ҳақда Ўзбекистон автомобиль ва дарё транспорти агентлиги ахборот хизмати хабар берди.
«Янги йўналишлар Фарғона водийси вилоятлари аҳолисига автотранспорт хизматлари кўрсатиш сифатини яхшилаш ва ташувлар хавфсизлигини таъминлаш, жумладан, пойтахтга енгил автомобилларда қонунга бўйсунган ҳолда йўловчи ташишни ташкил этиш мақсадида ҳукумат топшириғи ва мутасадди идоралар таклифига кўра Ўзбекистон автомобиль ва дарё транспорти агентлиги, Давлат солиқ қўмитаси, Ички ишлар вазирлигининг Йўл ҳаракати хавфсизлиги бош бошқармаси ҳамда тегишли маҳаллий ҳокимият органлари биргаликда очилди», — деди Агентлик бошлиғи ўринбосари Ш. Шоваҳобов 1 август куни бўлиб ўтган матбуот анжуманида.
Янги йўналишларни очиш борасидаги тайёргарлик ишлари сифатида Тошкент, Андижон, Наманган, Фарғона ва Қўқон шаҳарларидаги йўналишлар охирги бекатлари қурилди. Ушбу автостанцияларда автомобиллар тўхтаб туриши, йўловчиларни олиш ва тушириш учун махсус жойлар, рейс олдидан ҳайдовчиларни тиббий ва автотранспорт воситаларини техник кўрикдан ўтказиш масканлари, йўловчилар ва ҳайдовчилар учун турли қулайликлар, жумладан, маълумот бериш хонаси, овқатланиш ва дам олиш жойлари, меҳмонхоналар, чиптахоналар, ҳожатхоналар барпо этилган.
Такси йўналишларининг охирги бекатлари сифатида Тошкент шаҳрида — Бектемир тумани, Олтин топган кўчаси, 2-А уйда жойлашган «Водий» автостанцияси, Фарғона шаҳрида — «6-сой бўйи» МФЙ, Ёрмозор кўчаси, 1-уйда жойлашган «Фарғона» автовокзали, Андижон шаҳрида — Комил Яшин кўчаси, 281-уйда жойлашган «Узумзор» автостанцияси, Наманган шаҳрида — Ғирвонсой кўчасида жойлашган «Наманган» автостанцияси, Қўқон шаҳрида — Данғара тумани, Қўқон ҳудуди, Тошкент кўчаси, 1-уйда жойлашган «Данғара» автостанцияси танланди.
Изоҳ (0)