“Toshkent — Andijon”, “Toshkent — Namangan”, “Toshkent — Farg‘ona” va “Toshkent — Qo‘qon” taksi yo‘nalishlarini ochish borasida tayyorgarlik ishlari amalga oshirildi va mazkur yo‘nalishlarning shu yil avgust oyi boshida ishga tushirilishi rejalashtirilmoqda. Bu haqda O‘zbekiston avtomobil va daryo transporti agentligi axborot xizmati xabar berdi.
“Yangi yo‘nalishlar Farg‘ona vodiysi viloyatlari aholisiga avtotransport xizmatlari ko‘rsatish sifatini yaxshilash va tashuvlar xavfsizligini ta’minlash, jumladan, poytaxtga yengil avtomobillarda qonunga bo‘ysungan holda yo‘lovchi tashishni tashkil etish maqsadida hukumat topshirig‘i va mutasaddi idoralar taklifiga ko‘ra O‘zbekiston avtomobil va daryo transporti agentligi, Davlat soliq qo‘mitasi, Ichki ishlar vazirligining Yo‘l harakati xavfsizligi bosh boshqarmasi hamda tegishli mahalliy hokimiyat organlari birgalikda ochildi”, — dedi Agentlik boshlig‘i o‘rinbosari Sh. Shovahobov 1-avgust kuni bo‘lib o‘tgan matbuot anjumanida.
Yangi yo‘nalishlarni ochish borasidagi tayyorgarlik ishlari sifatida Toshkent, Andijon, Namangan, Farg‘ona va Qo‘qon shaharlaridagi yo‘nalishlar oxirgi bekatlari qurildi. Ushbu avtostansiyalarda avtomobillar to‘xtab turishi, yo‘lovchilarni olish va tushirish uchun maxsus joylar, reys oldidan haydovchilarni tibbiy va avtotransport vositalarini texnik ko‘rikdan o‘tkazish maskanlari, yo‘lovchilar va haydovchilar uchun turli qulayliklar, jumladan, ma’lumot berish xonasi, ovqatlanish va dam olish joylari, mehmonxonalar, chiptaxonalar, hojatxonalar barpo etilgan.
Taksi yo‘nalishlarining oxirgi bekatlari sifatida Toshkent shahrida — Bektemir tumani, Oltin topgan ko‘chasi, 2-A uyda joylashgan “Vodiy” avtostansiyasi, Farg‘ona shahrida — “6-soy bo‘yi” MFY, Yormozor ko‘chasi, 1-uyda joylashgan “Farg‘ona” avtovokzali, Andijon shahrida — Komil Yashin ko‘chasi, 281-uyda joylashgan “Uzumzor” avtostansiyasi, Namangan shahrida — G‘irvonsoy ko‘chasida joylashgan “Namangan” avtostansiyasi, Qo‘qon shahrida — Dang‘ara tumani, Qo‘qon hududi, Toshkent ko‘chasi, 1-uyda joylashgan “Dang‘ara” avtostantsiyasi tanlandi.
Izoh (0)